Wenner van die kompetisie vir liefdesgedigte met ‘n Pablo Neruda-reël

 

 

 

Hein Viljoen se gedig “Rivier” is die wengedig.

 

Die beoordelaars skryf soos volg oor die beoordelingsproses:

 

“Ek het gefokus op verrassende beeldgebruik en wending. Pablo Neruda se werk is so beroemd en vormend tov die internasionale digkuns, dat gesprekvoering daarmee maklik clichématig kan raak deur in allerlei oorbekende beelde te verval. Die gedigte wat ek as die beste beskou, het dan spesifiek die liefdestema (wat telkens in die verse na vore kom) op ongewone, speelse wyse ontgin. Klank- en taalgebruik is uiteraard ook in ag geneem. (Marni Bonthuys).

Elke liefdesgedig verskaf sy eie rubriek waarvolgens dit beoordeel kan word. Wanneer jy ’n gedig lees, kom die sterk- en swakpunte self te voorskyn. Daaraan beoordeel jy ’n gedig (of dit geslaagd of minder geslaagd is) en bied dié beoordeling self ’n platform waarvolgens gedigte met mekaar vergelyk kan word. Vir my was die oopmaak van narratiewe ruimtes deur poëtiese vertelstrategieë in “en ruimtes word geopen met behulp van die wind” [byvoorbeeld besonder treffend]. [Ook], het die taktiele woordgebruik in “rivier”, wat ’n verbondenheid met die tasbare wêreld vooropstel, my betower. Die subtiele seggingskrag van die spreker in “Rondom my” het [beïndruk]. “Vanaand kan ek die hartseerste reëls skryf” maak van Neruda se mees bekende versreëls gebruik as intertekstuele verwysing om die spreker se eie liefdesverlies op ’n aangrypende wyse uit te beeld. Die inskrywings was van ’n hoë standaard gewees en dit was moeilik om die gedigte beoordelend te lees. Tog was dit ’n baie lonende proses. (Alwyn Roux).

Professor Bernard Odendaal was veral beïndruk met die hoë standaard van al die inskrywings. Weer eens was dit besonder moeilik om slegs een wenner aan te wys. Baie geluk aan Hein Viljoen wat met die prysgeld van R2 000 wegstap.

 

Die beoordelingspaneel het bestaan uit die volgende literatore:

 

Prof. Bernard Odendaal

Dr. Alwyn Roux

Dr. Marni Bonthuys

 

Die wengedig

 

Rivier

 

como en la piedra fresca
del manantial, el agua
abre un ancho relámpago de espuma,
así es la sonrisa en tu rostro,
bella

 

soos koel water stroom oor ‘n klip glimlag jy

die geur van water modder biesies en mos

die rivier is jy kabbelend sondeurdrenk

kaats jy skerwe son teen die bome op

 

biesies en watergras is jy

welig vasgesuig in die sagte modder

vislarwes krieseltjies grond

varswaterplankton klein garnaaltjies

dwarrel om jou wortels rond

 

boom is jy jou wortels diep in die nat wal

jou takke buig hoog maar deemoedig bo die gras

waar vinke aan jou takkies nessies kom weef

bye heeldag om jou blommeslierte zoem

 

die berg is jy groen van gras en doringbome

klippe rooi rotsvorms ruwe kranse

sagte rondings wat die vorms van jou bors herhaal

die kelk van jou heupe jou geheime vallei

 

as ek aan jou mond raak en in jou oë kyk

sien ek die aarde in jou oë water en lug

die son vlammend teen die horison oprys

 

 

Bookmark and Share

9 Kommentare op “Wenner van die kompetisie vir liefdesgedigte met ‘n Pablo Neruda-reël”

  1. Joan Hambidge :

    Geluk, Hein!

  2. Bester Meyer :

    Is mooi. Baie geluk!

  3. Veels geluk Hein. Ek hou van die manier hoe jy die Neruda-fases laat deurskemer in jou gedig. Mens sou kon dink dat Neruda soiets kon gelewer het indien hy in Afrikaans geskryf het.

  4. Susan Smith :

    Wat ‘n lieflike gedig, Hein! Welgedaan.

  5. René Bohnen :

    Veels geluk, Hein!

  6. Hein Viljoen :

    Baie dankie, almal. Neruda is formidabel. Jy het hom wonderlik vir ons oopgemaak, De Waal.

  7. Hein Viljoen :

    Die laaste reël ontbreek ongelukkig in hierdie weergawe. Dit lui:

    die son vlammend bo die horison oprys

  8. Nadine Hamman :

    Baie geluk!

  9. Elmarie Reinke :

    Pragtige gedig.