Bester Meyer. X

 

X

 

wat noem ek die oomblik

vóór die gedig

wat deur ‘x’ aangedui word?

 

die oomblik voor die uiting,

voor die ontstaan van woorde

die oomblik voor die aan-breek van die skryf

die suiwer gevoel van dit móét nou uitwaarts?

 

wanneer die hart nié orgaan van weet is nie –

(of eerder té orgaan is van die weet − )

wanneer gevoel nog nie misplaaste woorde is nie,

en ʼn gevoel van God

dit wil verplaas

wat deur mens herlei moet word.

 

wanneer woorde se wanklank

nog nie ʼn wrangsmaak geword het nie

en eggo, binne bestek van die word-ding –

 

die Teenwoordigheid voor artikulasie of assosiasie

vóór die goddelike distribusie-kanaal

die verspreider die reg probeer gee

om te probeer herlei

wat onherleibaar is −

 

is die ‘x’ God-in-my

of menslike inspirasie

wat suiwer is soos God

voor die uiting daarvan?

 

nee,

x is die hart se tok-tok

gehoor as oor en oor polsing

wat uitsien na die oomblik

− oomblikke van nou in die grou blou −

wanneer daar totsiens gesê sal word aan x

om in daardie vaarwel (as roeping)

te weet

God is

verslawing van mensgemaakte y-tings

 

© Bester Meyer, 2022

 

Bookmark and Share

Comments are closed.