Joan Hambidge. Lykdig
Lykdig
Vir Thomas Deacon
Jy het ons geleer
om stadig te kyk
weer te kyk
in te kyk
na klippe en sand
volstruisduwweltjies
tweemondig
nes die streektaal
wat jou geskep het
die heutjiehee
se geroep
klink nog voort
in jou woordreise
oor ‘n woestyn
nou is die pê-pê fluit
‘n afskeidsroep
maar jy het jou lêgat
in ons taal gevind
soos growwe-twa
fyn-twa en ‘ga-gras
met ons voetsaam
oor die rante
van jou digkuns
© Joan Hambidge, 2022
