Weet jy dan nie?
My broer se dogter
in Amerika bestel
’n handgemaakte
houtstoeltjie
vir haar jongste –
presies soos
haar oudste kind s’n.
’n E-pos kom terug:
Weet jy dan nie
dat die Oekraïne
in ’n oorlog is nie,
dat ek en my vrou
probeer om ons kinders
van drie en vyf
aan die lewe te hou nie?
Ons vlug, skuil, vlug
teen die bomme uit die lug
wat ons soos houtstoeltjies
tot niks wil versplinter.
© Marthe McLoud, 2022