Nini Bennett. Vulkaanwinter

 

Vulkaanwinter

 

Ons was hier

die dag toe die hemele geval

en die biosfeer gebrand het,

die einde van die Mesosoïkum

se Jura en Kryt

 

ons was hier

met die impak

toe Shiva se toorn ontvlam

en die Chicxub-krater ons Gaia gewond het –

 

toe die laaste dinosourusse

uitsterf, het die eerste

blomme verskyn

 

waarheen het die reptiele, die vluglose voëls verdwyn –

 

ons was hier

met die geboorte

van sterre soos veerlinge

ons het in die uurwagter

se huise vertoef,

’n memorie onthou

wat ons nie geleef het nie

déjà vus se dwaalgeeste wat as

die verlede aanmeld

 

en die ewige geboorte

van die aarde

toe tiridium die grond

versilwer en ons liefde Samsara

uit die as van vulkaanwinters

geblom het

 

© Nini Bennett, 2022

 

Bookmark and Share

Comments are closed.