Joan Hambidge. Opruiming 5

 

Opruiming 5

 

Vanoggend vlieg twee kraaie ongenooid

in my motorhuis vol bokse met boeke:

”Opgaarder en sentimentalis”, skryf

‘n vriendin aan my tydens háár opruiming.

 

Sonneklaar die titel van my memories

oor ‘n lewe nou verpak rondom reise,

vergaderings, lesings, dispute, resensies,

opnames vir radio en TV: berigte-te-velde.

 

Wyl hierdie vers ontsluit kyk twee digters toe:

Leipoldt en Marais langs boeke oor die boereoorlog.

Vir ironie is daar ‘n hanger leeg wat verder skel:

“Vat jou goed en trek, Ferreira!” vir swaardra

 

al aan die een kant, Joanie-met-die-hoepelhart.

Met jou spotter gaan jy na bed: ‘n lewe-in-woorde

nou in ‘n ander ruimte staangemaak, opgemaak,

opgestapel, weggepak; wetend poësie inderdaad

 

‘n teenstelling tussen stille geweld van binne

wat glo beskerm teen durende geweld van buite.

Glashelder was Wallace Stevens se dictum toe.

Dertien lysters by hom; twee swart kraaie by my.

 

© Joan Hambidge, 2022

 

Bookmark and Share

Los kommentaar

 

*