Marthé McLoud. Die gesig van oorlog
Die Gesig van Oorlog
(Besoek aan Viëtnam)
Ons reis verby rysvelde na die dieptes van engtevrees
waar slang, spinnekop en skerpioen krioel.
Hier het soldate soos akkedisse op hul mae
in ondergrondse tonnels in-en-uit blaarbedekte gate geseil.
Maak vir my ruimte in dié doolhof van vrees
en bloed, want in myself het ek dit te nou om
gebreklikes van die maanlandskap-gif
in die museum te gaan aanskou. Twee koppe een lyf.
Ons reis verby rysvelde na die dieptes van vrees
en in myself het ek dit te nou want Bosoorlogbeelde
bly in my klou. Sy brief. Sy maats.
En hoe hulle die ratel agterna moes skoonmaak.
© Marthé McLoud, 2022
