LEESLES
In jou prietpraat
hoor ek iets subtieler as woorde
asof mikrotone
tussen sillabes bewe
en stiltes die sinne vul
ja met die ritme van jou asem
raak jy my aan.
Wanneer jou mond beweeg
volg ek die wegkyk in jou oë
die wisselende klemtoon
deur klein gebare
en die stand van kop en ken.
‘n Uitgebreide alfabet
lê in jou hande
in sagte vingertaal
lees ek jou raak.
© Zandra Bezuidenhout
Sept. 2022