Trauma
Gemeenskappe se seer
sal veral naweke manifesteer
in provinsiale hospitale
se trouma-eenhede en sale:
stomp trouma:
(Dokter, ek het geval;
Mevrou, hoe lank slaan hy jou al?);
nob:
(Daddy het baba vir
Mammie gegooi
– toe val sy op haar kop);
messteek en skietwond
se gapende nood
wys genadeloses se onverskillige
dans met die dood
en ewe naar
naas mekaar
bloei bid en vloek
rooi-rooi vlekke
op die steriele doek;
medici verweer
met desperate resussitasie
en spoed-operasie:
een kom om,
‘n ander kry grasie.
(*nob: akroniem wat algemeen in hospitale gebruik word vir nie-ongeluk beserings.)
© Salvia Ockhuis, 2023