Die bruinslangarend
Fier orent sit hy daar hoog
in die haak-en-steek se kroon.
Slegs die kop beweeg.
Daardie oë,
so wawyd oop,
bly kaats die veld
se rondomgeel
en als verdag
wat onder waag
beweeg.
Vader, gee ons tog ook sulke parate bewaarders,
want grootoog lê ons wakker, welwetend hoe ongehinderd
dood en verminking hier oor elke werf mag glibber.
© Hennie Nortje, 2023. “Noord van Malelane”. Turksvy Publikasies.
Treffende en relevante vers met ‘n lieflike illustrasie deur Pieter Nortjé.
Mag die smeekgebed in die slot spoedig begin vrugte dra!
Geluk Hendrik en groot dank aan Marlene Malan van Turksvy Publikasies – hierdie bundel gaan vele bome laat bot!