Nawalni (1976 – 2024)
I.
Die Moederland sal eindelik eendag vry wees
en Moskou sal sy plek as wêreldstad inneem.
Die gees van Poesjkin, Tolstoi en Majakofski
sal oor die water van die Moskwa sweef en in
die bome van die Khimki-woude resoneer as
die Alexandrof Ensemble ’n loflied aan haar,
die Moederland, se uitgestrekte Steppe bring.
En in Sint Petersburg sal Sjostakowitsj speel:
’n wals aan almal wat die vryheidsideaal van
hierdie somber land nog ken, die droom wat
steeds ontwyk, in die e-demokrasie wat kom.
II.
(Geparafraseer uit Anna Akhmatowa se Requiem)
Die uur van die dooies het weer aangebreek.
Ek sien elkeen, hoor elkeen, en voel elkeen –
die een wat die sleur van ’n oop venster ken;
die een wat nie die bekende grond betree nie;
die een wat die tuiskoms kopskuddend soek.
Ek het ’n kleed uit my woorde vir jou geweef.
Ek sal jou nooit vergeet nie, waar ek ookal is.
En al klamp hulle my gewonde mond dig toe
waardeur ‘n honderdmiljoen mense gesmeek
het, wil ek só onthou word wanneer ek sterf.
As iemand eendag ’n gedenkteken vir my bou
bou dit nie hier by die see waar julle nou is nie.
Bou dit waar ek vir driehonderd uur gestaan
het en niemand die deur oopgemaak het nie.
Vergeet hoe haatlik hulle dit toegeslaan het –
hoe hierdie mens soos ’n gewonde dier gehuil
het, en hoe die ys soos trane uit my ooglede
se onwrikbare brons sou vloei.
En laat die tronkduif in die verte koer as die
skepe ongestoord in hierdie rivier wegvaar.
III.
’n Lig sal skyn uit Pokrof Strafkolonie No. 2
en Yulia, Dasha en Zakhar sal hom weer sien.
© Mellet Moll, Junie 2022
The AVBOB Poetry Competition reopens on 1 August 2024. Visit our extensive archive at www.avbobpoetry.co.za and find inspiration for your writing by reading the work of other poets in all 11 of South Africa’s official written languages. Follow us on social media for news, announcements and opportunities.
Tydig en roerend.
Welgedaan!