kwaksalwery
na – Hieronymus Bosch se
“Extraction of the stone of madness” (1502-1505)
jan en alleman nie soos lubbert das vasgegord op ʼn stoel
skuil gesigloos agter sleutelbord en skerm
kap selfvoldaan met vingers send send send
om hul alwentende X’e twitterend stronterig op die
internet te blerts
is dit erger as ou das se kwak wat hom so tuit op die kop verlos
van die gepik in sy bol das wat die oopkloof van skedel en vel se
pyn verdra min wetend dat hy blom in die hand sonder sy lus of lag
sal huis toe gaan so tevrede so steeds die kluts kwyt
gaan die klots weg met sy bittermakrolle tot groot vermaak
van flippie van boergondië wat hierdie vy verkopery deur
prentmaker bosch laat vaslê die grap op ʼn doek hoe niemand nader
staan om te help die kye uyt te snyt
agter skerms en sleutelbord het niks verander sedert vyftienhonderd-en-iets
boor die tuitdraers nou op google rond
ook mooi bewaak deur kantlynkore met woordamulet en kerkgewade
kwak die hele spul nou wyer voort in twintigvierentwintig oor depressie tot vetrolle
of die kleur van dit in ʼn kind se doek
word die tuitdraers aangepor like like like share share share tot die hele wêred
al twitterend beter weet
© Rina Bester, 2024