Plantasie
Ek is ’n bioom
sampioenspore en lugstrome
vertak tot filament en fungi dis die moederbome
wat haar saailinge voed,
miselium se waarskuwings betyds SOS –
as die matriarge in gevaar verkeer, staar
die hele woud uitwissing in die gesig.
Ek is ’n boom, ’n misterieuse Gestalt
ek verstaan lokus beter as bewegende diere
bome vorm alliansies en kolonies
die bejaardes met die skeletagtige winterkrone
verdring nie mekaar vir lig nie
al wag die kroonprinse dat die monarge val –
die tydlyn van bome beweeg stadig, beweeg
oor honderde jare.
Ek is ’n boom, ’n biologiese filosoof
net die ingewydes in die eike,
die pratende orakels, verstaan die profesieë
van duif en dendromansie en
ek is ’n ekosoniese koor; die voëls se stofbad
voorspel lang sillabes reën, digte druppels kolloïde
want ek is my eie chronoloog, ek weet
dat jaarringe my outobiografie
van droogtes en oorstromings, vulkane en aardverwarming, is
hoe donker bloei my ringe in laat somer,
hoe lig herhaal die keerkring van lente.
Ek is ’n boom, ’n katedraal;
in my saad vonk die ewigheid, versprei
vlermuise en voëls my diaspora
getrou aan die antieke wet van leef.
© Nini Bennett-Moll, 2024