’n Poësieprys wat hulde bring aan een van Afrikaans se literêre ikone, Breyten Breytenbach, word voortaan jaarliks toegeken. Die nuwe Breyten Breytenbach-prys vir Afrikaanse digkuns beloop R200 000 – sonderlinge aansporing in ’n genre wat relatief min erkenning kry in die vorm van literêre pryse.
Die prys maak deel uit van die jaarlikse kykNET-Rapportpryse en word toegeken vir Afrikaanse digbundels wat in die voorafgaande kalenderjaar verskyn het.
Breyten Breytenbach se weduwee, Yolande, sê haar man sou diep geraak gewees het deur die prys, en om te weet dat dit die breër gemeenskap van Afrikaanse digters dien.
Sy voeg by: “In ’n tyd van beduidende kulturele en demografiese verandering vier hierdie inisiatief nie net individuele prestasie nie, maar versterk en inspireer dit ook die kreatiewe gees van Afrikaanse poësie. Ek is innig dankbaar dat sy naam met so ’n betekenisvolle gebaar geassosieer word – een wat die blywende betekenis van sy en ander se bydraes tot die taal en sy letterkunde bevestig.”
Die sameroeper van die kykNET-Rapportpryse, Hettie Scholtz, sê die noodsaak van hierdie prys kan nie genoeg beklemtoon word nie. “Dit moet vir elke digter in Afrikaans ’n riem onder die hart wees. Ek sien klaar hoe die genre gaan blom.”
Die eerste Breyten Breytenbach-prys word in September vanjaar saam met die ander kykNET-Rapportpryse in Kaapstad toegeken.
Vir meer inligting oor die Breyten Breytenbach-prys, kontak Hettie Scholtz by 084 583 0272 of scholtz5@mweb.co.za.
EINDE
PERSVERKLARING UITGEREIK DEUR
Anita van Zyl
anita@vanzylpr.co.za
083 709 6677