palinode
die dame Godiva en die perd
John Collier sou haar blind moes verf
want kaal mag niemand haar sien
net die loervink sou mag koekeloer
totdat Breyten haar anders tooi
alsiende dan, soos Stesichorus nou sal wens:
haar perd wissel gedaante
hy gallop stokskuimerig die skeppingsheelal binne
Breyten se dekonstruksie vel ʼn ooglose saal
op die rug van ʼn gimnas se houtperd swetend
en bokant die verstekte punte van haar verbeelde borste
is die perdkopvrou, en getrou met die lyne
van haar herbesinde liggaam, en een met haar hings,
swaaiheupe en spoegneusgate en salpeterlyf:
trek hy terug wat sou kon wees sy eie tekenvers
die beeld van die kaalbors vrou
met haar rooi maanhaar oor die naakte lyf
© Krige Visser, 2025