Gerhard Michael Barkhuizen (09-01-1956) is gebore in Knysna in die Wes-Kaap. Hy is ’n afgetrede sielkundige en was hoof van die Psigo-opvoedkundige komponent in die Kaapse Wynland Onderwysdistrik. Tans is hy woonagtig in Worcester.
Hy behaal sy MA & PhD in Sielkunde aan die Universiteit van Stellenbosch en die Vrystaat onderskeidelik. In 2018 voltooi hy ook ’n MA in Kreatiewe Skryfwerk aan die Universiteit van Kaapstad onder leiding van prof. Joan Hambidge.
Die kunste in die breë sin was nog altyd een van Barkhuizen se aktiewe belangstellings, veral toegepaste kuns soos beeldhouwerk en digkuns. Sy avontuurlustige kant is lief vir reis en deelname aan sport, veral fietsry.
Sy debuutbundel, Smee (2021), spruit uit die MA in Kreatiewe Skryfwerk. As deel van die kursus is die samehang en wisselwerking tussen die kunste as onderwerp gekies. Daaruit het verskeie ekfrastiese verse gevolg. Ook ’n aantal outo-ekfrastiese verse. Soms inspireer ’n kunswerk die uitvoering daarvan in ’n gedig, soms gebeur die teenoorgestelde. Dus (be)leef hy die wisselwerking tussen verskillende kunsvorme akuut en dien dit as wedersydse inspirasie.
Strik (2024) volg op Smee met ’n bondiger (en effe ligter) aanslag. Die poging/doelwit was om menswees deur verskeie fases met kort gedigte (meesal kwatryne) weer te gee.
Beide bundels is deur Turksvy Publikasies uitgegee met Daniel Hugo as redakteur.
Die beeldhouwerk wissel spontaan af met die skryfwerk – en dieselfde soort dissipline en toewyding word vereis om ’n afgeronde produk daar te stel.
Uiteraard skep die lewe in die geheel die raamwerk waarbinne die digkuns figureer, en word die Sielkunde as beroep ook tesame met ander temas in beide bundels belig.
Publikasies:
Smee (2021)
Strik (2024)
AVBOB poësiekompetisie (verskeie gedigte)
AVBOB poësiekompetisie (opdraggedig vir bloemlesing)
[Nota van die Versindaba redaksie: Ons wil graag nuwe en ou digters aanmoedig om vir ons opgedateerde profiele aan te stuur na taljard.marlies@gmail.com
Van ‘n digter wat al een of meer solo-bundels by ‘n erkende uitgewer gepubliseer het, versoek ons die volgende:
-
-
- ‘n Redelik onlangse foto in JPG-formaat
- ‘n Lys van publikasies (ook die belangrikste nie-poëtiese publikasies)
- ‘n Kort lewenskets wat inligting bevat oor o.a. waar en wanneer jy gebore is en grootgeword het, waar jy studeer het, watter beroep jy beoefen of waarmee jy jou tans besig hou, waar jy op die oomblik woon, ens.
- Enige ander interessante feite oor jou
-
Skryf asseblief die profiel in narratiewe vorm en nie as ‘n reeks feite ondermekaar nie, ten einde dit meer lesersvriendelik te maak.]