Ná ’n baie suksesvolle eerste Digtersweek in Nobember 2024, is dit weer tyd om aan aspirerende en ontluikende digters die geleentheid te gee om hul vaardighede te slyp en hul kennis uit te brei.
Digtersweek 2025 vind aanlyn plaas van 18 tot 22 Augustus en word weereens gefasiliteer deur Amanda de Lange, voormalige joernalis en nou lewensafrigter en mentor vir ontluikende skrywers.
“Ek kry dikwels versoeke van kliënte of voornemende kliënte vir mentorskap in die digkuns, maar dit is nie my sterk punt nie. Toe besluit ek wat is dan beter as om ’n handvol meesters in poësie bymekaar te kry op een platform, vyf dae lank waar elkeen oor ’n aspek van die digkuns kan gesels,” het De Lange gesê. (Belangstellendes kan die blad The Writers Coach op Facebook besoek vir meer inligting en gereelde opdaterings rakende Digtersweek 2025.)
Die paneel digters vanjaar is inderdaad weer eens formidabel:
Johan Myburg (wenner van die Hertzogprys, Eugène Marais-prys, ATKV-prys);
Louis Esterhuizen (wenner van die Protea Poësieprys in 2011 vir sy bundel wat die water onthou);
Carina Stander (publiseer verskeie bundels, versamelbundels en romans, waarvan talle vir skole voorgeskryf is);
René Bohnen (tweede plek in die gesogte European Union Sol Plaatje Poetry Prize); en
Lynthia Julius (wenner van talle toekennings waaronder die Suid-Afrikaanse Literêre Toekenning vir haar debuutwerk Uit die kroes, en die gesogte Jan Rabie en Marjorie Wallace beurs vir haar toewyding aan literêre uitnemendheid).
Dié digters gaan deelnemers aand ná aand toerus met hul kennis en vaardighede.
Buiten die geleentheid om vrae te vra en aan die interaktiewe proses deel te neem, is daar vanjaar boonop vir deelnemers die unieke kans om een van hul gedigte in te stuur en direkte terugvoer ’n lid van die paneel te ontvang.
Deelnemers wat graag van dié geleentheid gebruik wil maak, moet hul gedig teen 13 Augustus per e-pos aan De Lange stuur tesame met hul bewys van registrasie (amanda@amandadelange.co.za).
“Ons wil graag aan die deelnemers die geleentheid gun om direk van die digters te hoor oor hul skryfwerk. Al die gedigte wat voorgelê word sal onder die digters versprei word en aan die begin van elke sessie sal hulle hul terugvoer met die skrywers deel,” het De Lange verduidelik.
Om die gesprekke so toeganklik moontlik te maak, word dit aanlyn aangebied. Belangstellendes kan dus van enige plek op die aardbol deelneem. Die koste per persoon is R750. Alle gesprekke sal ook ná die tyd aflyn beskikbaar wees vir almal wat die Digtersweek bygewoon het.
Die temas wat deur die week gedek word, is soos volg:
Maandag 18 Augustus, JOHAN MYBURG: Meer oor resepte en toorkrag
Dinsdag 19 Augustus, LOUIS ESTERHUIZEN: Die gedig: Konteks en resonansie
Woensdag 20 Augustus, CARINA STANDER: Skryf ’n liriese gedig in die vorm van die Maleise pantoen
Donderdag 21 Augustus, RENÉ BOHNEN: Musikaliteit in poësie
Vrydag 22 Augustus, LYNTHIA JULIUS: Die kreatiewe proses van digkuns en die uitdagings van ’n debuutpublikasie
Belangstellendes kan Amanda de Lange kontak by 0824915308 of ʼn e-pos stuur na amanda@amandadelange.co.za