Elna Crouse is op 30 Julie 195I in Port Elizabeth gebore. Sy spandeer die grootste gedeelte van haar skoolloopaan in Vryburg, maar matrikuleer aan die Hoërskool Voortrekker in Boksburg. In 1972 behaal sy die graad BA Tale met sielkunde as ekstra hoofvak en in 1973 H.N.O.D (buitengewone onderwys) by U.P. Sy hou skool by die Transoranje Skool vir Dowes en voltooi die Honneursgraad in Sielkunde buitemuurs by U.P. in 1975. Daarna werk sy as skoolsielkundige by die inspektoraat van Nasionale Opvoeding. Sy tree in die huwelik in 1977 met die beeldhouer Tienie Pritchard en verlaat die formele sektor. Vanaf 1997 – 2001 aanvaar sy weer betrekkings as sielkundige berader en menslikehulpbronbestuurder.
In 1998 verskyn die kortverhaalbundel ‘n Moeg hond onder die bed en in 2007 haar debuutdigbundel Gestaltes van ‘n dogter – in konfigurasie [Genugtig! uitgewers]
Moeg hond gaan hoofsaaklik oor mense wat voor ’n keuse te staan kom wat vooraf verwerwing van selfkennis vereis. Hierdie proses word ook in Gestaltes verbeeld en as mens analities na die skrywer se werk kyk, is haar belangstelling in hoe elke individuele mens se psige werk en sy keuses beïnvloed die kern van haar kreatiewe motivering.
Afrikaans
ek kan my oë vlugtig oor die boekblaaie stuur
die woord staan pretensieloos op papier
foneties in skryfsimbool uitgestal
maklik vir die tong om op te tel
in klanke aards en rond
wat ribbelend op r’e rol
grinterig in g’s gons
en vloei uit my mond
soos water oor spoelklip
die bron is ‘n hartfontein
wat opwel en oorloop en vul
leegtes vanaf harspan tot abdomen
die onthulling
as ek jou nie in jou oë kan kry nie
jou stilte ‘n lading dra
wat roer in jou vingers jou asem
se ritme weet ek jy bewaar jaloers
die geheim wat binne jou broei
wat weldra onder jou hande gestalte sal kry
as jy skigtig die doek van die klei afhaal
is jou skouers styf jy voel kaal
soos jou beeld met hierdie blootlê
van jou heiligste vir ontgogeling
© Elna Crouse – Maart 2009