Illona Edwards

Illona Edwards

llona Edwards woon in Bonteheuwel, Kaapstad. Sy het regte studeer aan die Universiteit van Wes-Kaapland.

Verskeie van haar gedigte is gepubliseer in bundels van die Poetry Institute, Contrast, Versindaba 2006 en in Nuwe stemme 3. Sy neem gereeld deel aan die skryfskole wat deur LitNet aangebied word. Sy skryf ook graag kortverhale en hou van lees en van diere. Van haar kortverhale is ook ingesluit in die 2021 US Woordfees Kortverhaalbundel saamgestel deur Suzette Kotzé-Myburgh, Valda Jansen en Marius Swart.

Op die vraag “wat maak jou skryf?” antwoord Edwards: “Mense maak my skryf. Hulle is soms voorspelbaar en soms nie.”

 

Ek sit op iets met wiele

waarvan die wiele aangedryf

kan word met ’n stuk draad

waarmee kaalvoet kinders myle kan hardloop,

waarvan die armleunings gebruik kan word

om gebreekte arms en bene te stut.

My hand raak per ongeluk aan die boekrak.

Stofdeeltjies klou aan my vingerpunte

soos parasiete wat elke tikkie bloed

uit my liggaam wil suig.

covers van romantiese boeke

beeld bemindheid uit in enige vorm,

maar van porn? Moet my nie eens vra nie.

Bene verstrengel en uitgebeeld

op maniere waarvan die kunsliefhebbers

nou nog probeer uitvind of portrette

en die gooi van verf enigsins ter sprake moet wees.

En die celebrity status van borste

die gewig dra, of ’n man kan styf raak of nie.

En die gejaagde asems van Homo sapiens.

Die aandag trek van dié wat conveniently aan geheueverlies ly

as daar gepraat word van seks.

Maar hier sit ek

en soms in my kak.

En waar die kos soos ’n dripping tap

van my bek afval

en wit mini-uniforms my verblind

en waar my oë snapshots neem van lyf wat gewys word

en selfs dwaal na die bekende blow-up balloon

wat meisies allerhande kreatiewe flirts demonstrate

en waar die waarheid my klap

soos ’n rejected man wat dink hy’t ge-score

maar styf raak is nie vir my beskore nie.

 

Uit: Versindaba 2006. Marlise Joubert (samesteller), Protea Boekhuis, 2006

 

Bookmark and Share