Versindaba
~ 'n Weblog vir die Afrikaanse digkuns ~

Celesté Fritze is ’n skrywer en taalpraktisyn van Pretoria. Van 1981 af tot 1994 is sy redigeerder en vertaler by die stadsraad van Pretoria en die departement van onderwys en opleiding. Van 1995 af tot en met haar vroeë aftrede in 2006 is sy hoof van taaldienste by die Tshwane metro. Sy lewer onder meer taalbeleid- en taalbeplanningsreferate by taalkonferensies. Vanweë haar kantoor se bydrae tot die bedryf ken die Pan‑Suid‑Afrikaanse Taalraad in 2005 ’n veeltaligheidsmedalje aan Tshwane toe. Sedert April 2006 werk sy uit haar tuiskantoor as skrywer, vertaler, redigeerder, proefleser en taalkonsultant vir kliënte soos uitgewers, korporatiewe instansies, ambassades, plaaslike owerhede, taalagentskappe, universiteite en privaat individue.

Fritze se debuutroman, Verlorenkop, verskyn in 2016 by Queillerie (NB Uitgewers) en haal die kortlys van die Huisgenoot Tempo‑toekenning (kategorie beste Afrikaanse boek van die jaar 2016; die ATKV‑prosaprys 2017; die Jan Rabie Rapport‑prys (debuutwerk, fiksie 2017; en die South Arican Literary Award 2018 (kategorie “First-time published Author Award”).

Verdeelde stand | Divided Stance (2022) is die skrywer se debuutdigbundel.

Verdeelde stand / Divided Stance

Celesté Fritze

Omslag

Verdeelde stand | Divided Stance is haar debuut-digbundel. Dit is saamgestel uit die vermenging van onder meer tale, kulture en seksualiteite in die diverse Suid-Afrikaanse werklikheid oor verskeie tydvakke heen. Die Afrikaanse en Engelse gedigte meld aan in die digter se voorkeurtaal vir die tema, stemming of onderwerp en is nie vertalings of herwerkings van mekaar nie. Die digter gebruik die taal van die moeder en die werkstaal van die vader om wydlopende temas soos die omgewing, meertaligheid, tolking, die politieke bestel, die liefde, verlies en veroudering, die Covid-19-pandemie, metapoësie, delusies, en drome aan te roer.

Oor die outeur

Celesté Fritze is ’n welbekende digter en skrywer. Haar roman Verlorenkop was op die kortlys vir o.a. die ATKV‑prosaprys 2017 en die Jan Rabie Rapport‑prys (debuutwerk, fiksie) 2017.

[hemel en see boeke 2022. BLADSYE: 102. PRYS: R180. ISBN: 9 781998 958856]