Posts Tagged ‘Claudio Magris’

Magris ontvang Duitse Vredesprys

Tuesday, October 20th, 2009

Claudio Magris

Tydens die afsluiting van die Frankfurt Buchmesse verlede Sondag, het die Italiaanse skrywer Claudio Magris (70) die Vredesprys van Duitse Boekhandelaars in ontvangs geneem. Hierdie Vredesprys bestaan reeds sedert 1950 en word jaarliks toegeken aan ‘n skrywer wat deur middel van sy persoonlikheid, sowel as wetenskaplike, artistieke en literêre bedrywighede daadwerklik bydrae tot die uitbou van “pacifistische ideeën”, aldus De Papieren Man. Die prysgeld vanjaar het € 25,000 beloop.

Magris is internasionaal bekend vir sy boek “Danube: a sentimental journey from the source to the Black Sea” (1986) en fokus met sy skryfwerk deurgaans op die problematiek rondom multi-kulturele gemeenskappe. In sy dankwoord het Magris gewaarsku teen ‘n demokrasie wat hoegenaamd nie demokraties funksioneer nie. Sonder om die Italiaanse premier, Silvio Berlusconi, by die naam te noem, het Magris nogtans ‘n stewige klap na die Italiaanse regering gemik. Hy het die hoop uitgespreek dat sy land hopelik nié weer die aanstigter van gewraakte ideologieë soos fascisme sal word nie.

Vorige wenners van dié gesogte prys sluit onder andere die volgende in: Albert Schweitzer (1951), Ernst Bloch (1967), Max Frisch (1976), Václav Havel (1989) en Saul Friedländer (2007).

Lees die volledige berigte op die webblaaie van óf Deutsche Welle óf De Papieren Man.

***

Vanoggend is daar drie nuwe blog-inskrywings: Andries Bezuidenhout en Ronel Nel vertel van twee besonderse geleenthede hierdie week in die Kaap, terwyl Carina Stander liries raak oor die poësie in Etienne van Heerden se mees onlangse roman. Vir die Brieweboks het Loftus Marais vir ons ‘n kort, dog kragtige, opsomming gestuur van sy wedervaringe tydens sy deelname aan die onlangse Poetry Africa-fees wat in Durban plaasgevind het; toegelig met ‘n gedig (in Engels), nogals. Veral Ronel Nel se vertelling van ‘n besonder unieke projek, naamlik die uitkap van gedigte in klip, is iets wat gelees moet word.

Ten slotte, ‘n huldigingsgeleentheid vir Barend Toerien, wat onlangs oorlede is, sal eerskomende Saterdag op die bekende wynplaas Koopmanskloof buite Stellenbosch gehou word. Die geleentheid sal om 12:30 begin en sprekers wat tydens die geleentheid sal optree, is John Kannemeyer, Julian de Wette en Zandra Bezuidenhout. Laurinda Hofmeyr sal musiek verskaf aan die hand van Barend se gedigte wat sy getoonset het. ‘n Ligte ete, asook ietsie te drinke, sal voorgesit word.

En vanaand is dit om 22:00 weer Vers & Klank op RSG. Daniel Hugo lees ‘n keur uit sy gedigte voor. Gewis iets om na uit te sien …

Mooi bly.

LE

 

 

Nobelprys – Wat sê die beroepswedders?

Friday, October 2nd, 2009
Amos Oz

Amos Oz

Na aanleiding van gister se Nuuswekker oor moontlike kandidate vir vanjaar se Nobelprys vir Letterkunde, het ek so ‘n bietjie verder rondgesnuffel op die internet. Ek land toe op Earth Times se webblad waar hulle die Top 10 volgens die beroepswedders, Ladbrokes, aandui.

Hiervolgens is Amos Oz die gunsteling om vanjaar bekroon te word. Weddenskappe ten gunste van dié Israelse skrywer is tans 5 teen 1. Volgens Earth News se kommentator was Oz al meermale ‘n sterk teenwoordigheid op die Sweedse Akademie se kortlys. 

Voorts is Oz se uitgesproke steun vir ‘n twee-staat oplossing vir die probleme in die Midde-Ooste; ‘n standpunt wat die Sweede Akademie dalk sou wou bekragtig deur ‘n goue medalje om die nek van die hoof-agitator te hang …

Op Ladbrokes se voorkeurlys word Oz gevolg deur die Algerynsgebore Franse skryfster, Assia Djebar, met ‘n loting van 6 teen 1, asook die Spanjaard Luis Goytisola met 7 teen 1. Volgens Earth Times is dié twee kandidate in ooreenstemming met Ladbrokes se verwagting dat die wenner vanjaar uit Latyns-Amerikaanse geledere gaan kom …

Die res van die Top 10 bestaan uit die Amerikaanse hoop in die persone van Joyce Carol Oates en Philip Roth (albei met 8 teen 1), die Siriese digter Adonis (Ali Ahmad Said Asbar) op 9 teen 1, gevolg deur die Italiaanse paar Antoni Tabucchi en Claudio Magris, die Japannese reus Haruki Murakami, en nog ‘n gereelde gunsteling: Thomas Pynchon. Al die laasgenoemde kandidate met ‘n loting van 10 teen 1.

Bob Dylan, oor wie ek gister berig het, se kanse is ‘n skamele 26 teen 1, so ook die Kanadese duo, Alice Munro en Margaret Atwood.

Al bogenoemde in ag genome, is ek tog van mening dat dit vanjaar ‘n Amerikaner gaan wees … Wat dink jy? Laat weet ons; hetsy as kommentaar hieronder of in ‘n brief aan die Brieweboks gerig. Ek onderneem om ‘n gratis kopie van die Versindaba 2007 DVD as beloning te gee aan almal wat reg voorspel.

Lekker spekuleer en laat kom daai briewe!

Hieronder is ‘n aanhaling deur Amos Oz wat ek op hierdie webblad gevind het.

***

Vanoggend kan jy jou verlustig in Bernard Odendaal se resensie van Carina Stander se bundel woud van nege en negentig vlerke”. Nog ‘n toevoeging is Charl-Pierre Naudé se nuutste blog waarin hy sy kritici antwoord met ‘n gedig, onder andere.

Lekker lees en hê pret vandag. Die naweek is net ‘n oogknip ver … 

Mooi bly.

LE

 

“Two children of same cruel parent look at one another and see in each other the image of the cruel parent or the image of their past oppressor. This is very much the case between Jew and Arab: It’s a conflict between two victims.” –
  —  Amos Oz

  •