Posts Tagged ‘Cyril JM Clarke’

Cyril JM Clarke: dodedans

Monday, December 6th, 2021

 

dodedans

 

’n kleindorpse kadriel

 

die atmosfeer

in die koel interieur

van die imposante sandsteenkerk

is droefgeestig-gewyd

 

op die orrelgalery

die orreliste

slaggereed

voor die orrel

by die majestueuse orrelpype

op die kansel

roerloos

die prediker

’n mens-grootte vlermuis

in sy swart toga

met hoëpriesterlike swart fluweeltosseltjies

reg voor die kansel

die gereserveerde voorste gestoeltes

vir die familie – verkieslik stemmig geklee in swart

dan

die res van die gemeente

almal is daar

hy was ’n geliefde lid van sy gemeenskap

mens moet tog jou laaste eer betoon

die kerkklok dong-dong diep die laaste voltooide lewensjare

van hom wat ons voorafgegaan het

 

die soliede swaar swarthout-dubbelhoofdeure

gaap geruisloos oop

die orreliste hef aan

die gedrae donker dodemars

uit die oratorium “Saul” van Händel – molto maestoso

die vlêrmens vlieg orent

die teenwoordiges staan

rig hul oë

afwagtend soos bruilofsgangers

wat die binnekoms van die bruid verwag

op die gapende gang

wat die hoofskip van die heilige tempel

ewewydig verdeel

 

voor stap die langslewende eggenote

stemmig geklee

in ’n swart hoed – met smaakvolle gesigsluier

byderwetse dog sindelike swart tabberd

ARWA sheer gunmetal-sykouse

swart hofskoene

agterna

hulle wat

tot in die derde en vierde geslag

die afgestorwe geliefde innig liefgehad het

soos ’n swerm skroppende swart rawe

tot by die vooraf-uitverkore ereplek

almal sit

behalwe die voorganger

die finale orrelakkoorde

sterf

weg

 

die vlermuis

profeteer

sy volle geallokeerde uur

tot lof van die ontslape broeder

hy sal gemis word

hy was in sy gemeeskap

’n Seder van die Libanon

tot troos van die familie

sy plek is leeg

maar hy is

waarskynlik

reeds een van die grootste edelgesteentes

in die Meester se kroon

tot stigting van die gemeente

geliefdes

maak julle saak reg

ons bewandel almal dié dal van donker skadu’s

 

by die oop graf

tussen ’n menigte marmer- en grysgranietmonumente

almal opgerig

in liefdevolle herinnering aan dese en gene

word die stoflike oorskot

van die ontslape geliefde

in die duursame houtkis

behendig

ter aarde bestel

die bedroefdes onttrek

die graf word toegegooi

die vars hoop grond

van bo tot onder

verdoesel met wit-en-pers

plastiekkranse

aangedra deur meelewendes

 

die nabetragtingstee

is ’n kulinêre katarsis

daar’s

toebroodjies

vleispasteie

sop

koffie

tee

koeke

terte

en koeksisters

’n mens stuur hulle wat ver gereis het

nie honger huis toe nie

selfs die weduwee

emosioneel ontdaan

sit

getroos en gelawe

argeloos

en pik

aan ’n smaaklike skyf tradisionele melktert

 

© Cyril JM Clarke, 2021