Posts Tagged ‘Daniel Hugo gedig’

Daniel Hugo. Knapsekêrel

Monday, September 13th, 2021

 

Knapsekêrel

vir Pieter Fourie

 

in die telegraafkantoor

het jy as klerk veral dit

geleer: om woorde te tel

en hul waarde te weeg

 

want dit kos ’n prys

om bondig te berig oor

die lewe: sy vreugdes

en die durende ellende

 

jy het toe reeds geweet

waar om die woord stop

te plaas: dat jy elke sin

tot stilte moet dwing

 

Uit: Openbare domein, Naledi, 2018

 

Daniel Hugo. Bekverby

Tuesday, June 29th, 2021

 

Bekverby

 

talle blapse het ek in my lewe begaan

in die geselskap van ingeligte, gevatte

meesters van die vak, maar die meeste

is nou reeds dood, troos ek myself al te graag

 

tot onverhoeds dié dwangidee my tref:

 

sekerlik gaan hulle oor my skinder

in die ongenadige hiernamaals –

die gehoor daar is verbysterend uitgelese

en boonop tydloos internasionaal

 

van Calvyn tot Komrij, van Opperman tot Khajjam

 

geen wonder ek ontwyk desperaat die dood

drink sielalleen my dop en mompel in my baard

 

© Daniel Hugo, 2021

 

Daniel Hugo. Doggerel

Sunday, May 30th, 2021

 

Doggerel

 

Emily Dickinson, ons hond

(soos die digters van Facebook-land)

is literêr maar ongeletter

 

sy knor bang vir elke leiband

en kef oor daardie slinkse setter

wat weet haar drukwerk ruik na stront

 

© Daniel Hugo, 2021

 

Daniel Hugo. Literatuurles

Friday, May 21st, 2021

 

Literatuurles

 

as student leer ek op ’n duifryke dorp

die Nederlandse en Afrikaans letterkunde

is 800 jaar oud – lieflik begin dit met:

hebban olla vogala nestas hagunnan

 

intussen het daardie digkuns 900 jaar

oud geword – die tyd vlieg, maar gelukkig

is ek ’n voël met ’n nes en ’n wyfie

wat steeds bekoorlik in Diets kan koer

 

© Daniel Hugo, 2021

 

Daniel Hugo. Etiek

Monday, May 10th, 2021

 

Etiek

 

die digter is ’n dronklap

die digter is oorgewig

die digter is ’n pedofiel

die digter is ’n eunug

die digter is konserwatief

die digter is verlig

die digter is ’n ateïs

of kinderlik gelowig

wat doen ons nou

met elke wonderlike gedig?

 

© Daniel Hugo, 2021

 

Daniel Hugo. Johann Nel 70

Tuesday, May 4th, 2021

 

Johann Nel 70

4 Mei 2021

 

kunstenaar wat asem gee aan letters

op papier, wat die boom weer laat ritsel,

die geveerdes uitlok tot tortel en tjilp:

 

’n dwarrelwind deur blaaie van ’n boek

wat ooplê in ’n tuin waar die digter

dit ten slotte teësinnig moes verlaat

 

jou stem wek die vier seisoene

en laat ontdooi die emosie

van daardie windeier, die poësie

 

© Daniel Hugo, 2021

 

Daniel Hugo. Ou digter

Monday, April 12th, 2021

 

Ou digter

 

binnenshuise poësie:

’n sekerder simptoom

van laatwerk is daar nie

 

die vier seisoene

wat inkrimp tot ’n haikoe

op die middernagkassie

 

© Daniel Hugo, 2021

 

 

Daniel Hugo. Sinesteties

Monday, April 5th, 2021

 

Sinesteties

Vir Marlene

 

as sterre se lig pulseer

teen dieselfde frekwensie

as die krieke se geskril

 

is die brulpadda se brul

die volmaan wat klokhelder

deur die Karoonag beier

 

en jakkals met sy gehuil?

’n sekelmaan wat skelm

agter die vlieswolke skuil

 

die hees verskrikte kiewiet

wat al om haar nes roteer

flikker soos ’n satelliet

 

as niemand die digter keer

hou hy aan improviseer

 

© Daniel Hugo, 2021