Posts Tagged ‘Ernst dos Santos gedig’

Ernst dos Santos. Sing vir my ‘n Koos-Doep song

Friday, December 31st, 2021

 

Sing vir my ‘n Koos-Doep song

 

Skep vir my ‘n emmer son

vir die donker op my pad

blinddoek my met liefde

vir die onweer in my hart

 

rol my toe in jou donskombers

stook die kaggel

maak die deur dig toe

buite is ʼn storm wat woed

 

sing vir my ‘n Koos-Doep song

en laat my terugverlang

na lang dae en winteraande

met warm melk op die stoof

 

bring vir my reën uit die noorde

vir die droogte in my oë

lees vir my stories –

vir die honger in my siel.

 

© Ernst dos Santos, 2021

 

Ernst dos Santos. Herlewing

Friday, December 31st, 2021

 

Herlewing

 

Wees vir my lente –

bring bloeisels,

bring lewe

 

maak my weer kind

op die naat van my rug

onder ʼn geelperske,

dáár waar planete aan takke hang –

in die kortstondige spel

van opbloei tot val.

 

En sou ek myself verskans

waar wolke al seilend teen die blou

en sonstrale in vrugteboorde blink

 

sal ek onthou

hoe die seisoen van herlewing

my telkens wéér

omwortel.

 

© Ernst dos Santos, 2021

 

Ernst dos Santos. Godswonder

Friday, December 31st, 2021

 

Godswonder

 

In die gedaante

van ’n Afrikaanse swerwer¹

kom jy op my

uitgestrekte vingerpunt

tot rus

 

donkerblink

die lense in jou oë,

ragfyn jou vlerke

bolrond en ligblou

 

en soos jy wegvlieg

’n hunkering:

neem my saam

 

o, Godswonder –

neem my saam.

 

© Ernst dos Santos, 2021

 

¹Afrikaanse swerwer is ’n vlinder, Catopsilia florella.