Posts Tagged ‘Eunice Basson gedig’

Eunice Basson. Legkaart

Wednesday, March 23rd, 2022

 

Legkaart

 

’n Houtkissie met fyn inleg is al die jare

agter in haar hangkas gebêre, duidelik

die handewerk van Oupa se vlyt

uit St Helena, gevul met Ma se koestergoed,

waarvan net sý die geskiedenis ken:

’n hoedespeld, perlemoenknope en ’n kwartskristal,

drie tiekies en ’n seëlring met PB daarop gegraveer,

’n lapel- en skouerruiker deur tyd en boorders

verweer en  heel onder, verbleikte lanferbande.

Die PB was duidelik Pa se ring en Ma, as kranige

tuinier, het die ruikers straks self aanmekaar

gestring, maar eers op haar sterfbed sou die lanfer

nuwe lewe kry toe sy van haar drie babas vertel.

 

© Eunice Basson, 2022

 

Eunice Basson. Besoek aan Pelindaba

Wednesday, March 23rd, 2022

 

Besoek aan Pelindaba

Gedagtig aan Eugène Marais (1871-1936)

 

Blink soos lak in die oggendson rol ’n duisendpoot

voor haar voete oop, voel-voel oor die klam grond

op soek na rothout. ’n Ent van die opstal af,

onder karees en opslag, lê die voorsate met ’n uitsig

oor uitgediende drome van fisici en oorlogmakers.

 

In die koel rondawel-opstal met grasmatte

oor leiklipvloere wat in die winter na houtvuur ruik,

sou die digter hier kon asem skep. Sy verbeel haar

’n kaggel, smiddae reeds aangepak, waar hy langbeen

en vredig kon uitstrek, respyt vir sy gemoed.

 

© Eunice Basson, 2022

 

Eunice Basson. Sophie se wêreld

Saturday, February 26th, 2022

 

Sophie se wêreld

Vir Sophie Sihlenge

 

Reuke van veld, wol en goiing

draal in ’n pakskuur van die mathandelaar

waar haar ma bedags ou matte langnaald

afrond met soom en fraiings.

Ná skool, haar boeksak en skoene eenkant,

bondel en drapeer sy gebedsmatjies tot tent –

verbeel haar ’n nomade, reisend

oor sand en einders –

tot slaap haar oorval in ’n wêreld

van jasmyntee en verhale van kinderhande

wat elders fyn en vaardig weef en knoop

aan die sagte weelde ondervoets.

 

© Eunice Basson, 2020 (Uit: By die dag, Protea Boekhuis)

 

Eunice Basson. Almanak

Friday, February 25th, 2022

 

Almanak

Agter ’n kamerdeur

hang die aptekersalmanak

oorvol onsigbare gedenkdae

waarvan net sý nog weet:

háár troudag, feestelik,

maar sestig jaar gelede;

verjaarsdae van ’n man, nou dood

en kinders die wêreld oor.

So sit sy dagin, daguit, soms

met haar hande in haar skoot,

maar steeds word dag en datum,

waarvan net sý weet,

jaarliks op die kalender aangestip:

geboorte van ’n baba aan wie sy

slegs die dood kon skenk.

 

© Eunice Basson, 2020 (Uit: By die dag, Protea Boekhuis)

 

Eunice Basson. Pontdrif, Limpopo, Junie 1956

Friday, February 25th, 2022

 

Pontdrif, Limpopo, Junie 1956

Na ’n potloodtekening deur JH Pierneef (1886–1957)

 

Sy hartland is hierdie boswêreld

waar hy vroegdag, in sy element,

met ’n leersak potlode en kryt gaan sit,

pyp stop, bewus van ’n kolonie muishonde

wat elke beweging uit die verte bespied

soos hy die veld in grafiet belyn,

met ’n seker hand nuwe lewe gee aan drie,

vier apiesdorings in ’n oopte, omring

deur grysappel, blouhaak en witsering.

Later sal hy nog hier en daar ’n tak ligweg arseer,

terugstaan, hom hierdie toneel bly indink,

moontlik in kleur, op ’n groter doek getransponeer

in sy stil ateljee waar hy die boskorhaan

en kwêvoëls van dié oggend weer wil hoor roep.

 

© Eunice Basson, 2020 (Uit: By die dag, Protea Boekhuis)