Posts Tagged ‘fisika en poësie’

Nini Bennett. Vulkaanwinter

Friday, April 15th, 2022

 

Vulkaanwinter

 

Ons was hier

die dag toe die hemele geval

en die biosfeer gebrand het,

die einde van die Mesosoïkum

se Jura en Kryt

 

ons was hier

met die impak

toe Shiva se toorn ontvlam

en die Chicxub-krater ons Gaia gewond het –

 

toe die laaste dinosourusse

uitsterf, het die eerste

blomme verskyn

 

waarheen het die reptiele, die vluglose voëls verdwyn –

 

ons was hier

met die geboorte

van sterre soos veerlinge

ons het in die uurwagter

se huise vertoef,

’n memorie onthou

wat ons nie geleef het nie

déjà vus se dwaalgeeste wat as

die verlede aanmeld

 

en die ewige geboorte

van die aarde

toe tiridium die grond

versilwer en ons liefde Samsara

uit die as van vulkaanwinters

geblom het

 

© Nini Bennett, 2022

 

Mellet Moll. Vroed

Monday, March 21st, 2022

 

Vroed

 

Die hoeke van die huis sal nie meer treur nie

en die noordewind sal uiteindelik gaan slaap

die getye sal soos maankinders op die oewers

van die oseane speel, waar bedags die seevoëls

soos ver lugskepe oor uitgestrekte kimme draal

 

die hemelruim sal stil en ongerep bly aarsel

oor twee mense wat die nie-lineariteit van tyd

in onverkende ruimtes tussen mekaar ontdek

met die broosheid van ’n lankverlore melankolie

wat homself as die ongeskrewe vers aanmeld

 

in chromosome, sel na sel, net soos die bome

wat na die onverkrygbare, die immortale ligte

in die boonste koepel smag, heimlik reikend na

’n suurstofryke oerplaneet, ’n habitat van lug

en grond en water, maar veral van grond, want

 

óns is die grond, ons is fossiele in die keerkring

van hierdie lewe, ons is die betekenis daarvan:

kyk, die reën val neer oor onvervulde minnaars

wat in die verspeelde halflewe verdwaal, soos

die lacrimosa om en om die hoeke van ons huis

 

o, my tweeling

ek wil nie meer in winderige nagte slaap nie.

 

© Mellet Moll, 2022