Posts Tagged ‘Franco Colin gedig’

Franco Colin. Stephen Hawking

Tuesday, May 17th, 2022

 


Stephen Hawking

I’m putting myself to the fullest possible use,

which is all I think any conscious entity can ever hope to do.

HAL 9000 – 2001: A Space Odyssey

 

Alle bewussyn ontspring

uit ‘n beliggaamde punt:

‘n embrio dy na benede

uit tot spier en been,

oerknal bo tot ‘n weefnet van neurone,

ontvlam tot ‘n vuurvreterverstand

waarmee jy uitspansels naspeur,

jou verdiep in kosmiese stofsuiers

wat ʼn heelal insuig en kompakteer

tot ‘n speldkop waarop engele kan wals.

 

Plots word jou spiere verteer,

terug na die enkelvoudige,

HAL-9000-blikkerige

gevokaliseerde,

weggekwynde,

gewielde

sigoot:

 

jou lyf

nou ‘n swart

astronomiese metafoor.

 

© Franco Colin, 2022

 

 

Franco Colin. Breinskandering

Wednesday, March 2nd, 2022

 

Breinskandering

 

Doller as kopaf kan dit beslis.

Die deure swaai oop en voor my stoel

‘n guillotine met ‘n grootheidswaan:

‘n Gemotoriseerde bed voer my kop

vir die meganiese smoel van die masjien.

Met ‘n dreunende getrommel smul

die ondier aan my murgsagte misterie,

spoeg wit en swart selfies van my harsings,

pure porno vir neuroloë.

Die onsigbare word sienderoë verbeeld

deur megamagnetisme wat atome

laat rondomtalie. Ek soek verbysterd

deur die abstrakte ekspressionisme

van neuro-anatomie, vind geen taal

of tyding van siel of woord of vers nie:

Sonnette tol nie in magneetvelde nie;

kwantumfisika ken geen gebede,

geen metafore nie.

 

© Franco Colin, 2022

 

Franco Colin. Hare sny by Damian

Sunday, December 12th, 2021

 

Hare sny by Damian

 

Oorgange en transformasies neig ondergronds.

Grotagtig, langs aankoms en vertrek

van ʼn onderdakparkeerarea pryk

die haarkapper van Brooklyn-sentrum.

ʼn Barbierspaal pen kleim af vir bloedlating.

Wankelrige stapelstoele wag beurt af, vreemd verbleik

sonder sonbrand. Sagte beligting op chroom

barbierstoele voor spieëls verbloem die bles

kopdos. Klante  ̶  slo-mo predatoriese vismanne  ̶

skool die glastenk binne:

Simson-baracuda versoek ʼn poensskeer;

short-back-ʼn-buggerall-sides vir ʼn retrenched CEO-haai.

Jy sit omring met voosgevatte CAR Magazines

vol obsolete vervoer; POPULAR MECHANICS

beveel argaïese doen-dit-self planne aan; ʼn misplaasde

FAIR LADY proseliteer ewige jeug deur Botox,

bied kure aan vir die anorgasmiese vrou.

Barbier Damian (nom de guerre of voorbode?)

pak kaalkop die alopesiastryd aan tussen statiese

action figures en gedevalueerde banknootmuurpapier.

Sy glimmende elektriese sens maai jou yl tonsuur:

gʼn wolvag hier te gradeer nie.

Damian bied ʼn pomadesproei aan wat ruik na naeltjies:

gebottelde angeliere is tog geen antidoot teen tyd nie?

 

© Franco Colin, 2021