Posts Tagged ‘Gaza Youth Manifesto’

Desmond Painter. Kuberkrete: ‘n Jeugmanifes uit Gaza

Tuesday, January 4th, 2011

‘n Anonieme groep jeugdiges in Gaza, jy sou hulle kuberaktiviste kon noem, het onlangs ‘n aangrypende manifes oor hulle belewing van die situasie in hulle land opgestel en deur middel van die internet begin versprei. Die manifes verwoord hulle woede en frustasie met al die rolspelers in daardie konflik: Israel, Hamas, die VN, en ook ons, die internasionale gemeenskap. Dit is, soos die Guardian dit noem, ‘n hartstogtelike ‘kuberkreet’ uit ‘n oorlogsgeteisterde gebied; ‘n soort ‘anthem for doomed youth’. Wat hier volg is my vinnige vertaling van die manifes in Afrikaans: 

 

 

Fok Hamas. Fok Israel. Fok Fatah. Fok VN. Fok UNWRA. Fok VSA!

 

Ons, die jeug van Gaza, is gatvol van Israel, Hamas, die besetting, die vertrapping van ons menseregte, en die onverskilligheid van die internasionale gemeenskap!

 

Ons wil skree, deur hierdie muur van stilswye, ongeregtigheid en onverskilligheid breek soos Israel se F16s deur die klankgrens breek; met alle mag uit ons siele uit skree, sodat ons bevry kan word van ons oorweldigende, verterende frustrasie met hierdie fokken situasie waarin ons leef…

 

Ons is siek daarvan om vasgevang te wees in hierdie politieke stryd; siek van kooldonker nagte met vliegtuie wat bo-oor ons huise rondvlieg; siek daarvan dat onskuldige boere in die buffersone geskiet word, bloot omdat hulle na hulle lande omsien; siek van bebaarde mans met gewere, wat hulle mag misbruik en jong mense opneuk of opsluit omdat hulle betoog vir dit waarin hulle glo; siek van die muur van skaamte wat ons skei van die res van ons land, wat ons gevange hou op ‘n stukkie aarde die grootte van ‘n posseël; siek daarvan om uitgebeeld te word as terroriste, tuisgemaakte fanatici met plofstof in ons broeksakke en boosheid in ons oë; siek van die onverskilligheid waarmee ons deur die internasionale gemeenskap bejeën word, sogenaamde deskundiges in die lug van opinies en opstel van resolusies, maar lafaards wanneer dit kom by die toepassing van enigiets waaroor hulle ooreengekom het; ons is siek en sat daarvan om hierdie kak lewe te lei, om in die tronk aangehou te word deur Israel, om opgefok te word deur Hamas, om totaal geïgnoreer te word deur die res van die wereld.

 

Daar is ‘n revolusie aan die broei in ons, ‘n reusagtige ontevredenheid en frustrasie wat ons sal vernietig as ons nie ‘n manier kan vind om hierdie energie te kanaliseer in iets wat die status quo kan uitdaag en ons een of ander vorm van hoop kan gee nie.

 

Ons het Operasie Cast Lead, waartydens Israel met groot effektiwiteit die hel uit ons uit gebom het, en duisende huise en selfs meer lewens en drome vernietig het, skaars oorleef. Gedurende die oorlog het ons onmiskenbaar die gevoel gekry dat Israel ons graag sal wil uitwis van die Aarde. Gedurende die laaste paar jaar doen Hamas alles in hulle vermoë om ons gedagtes, gedrag en strewes te beheer. Hier in Gaza is ons bang om opgesluit, geondervra, geslaan, gemartel, gebombardeer en doodgemaak te word. Ons kan nie beweeg soos ons wil nie, sê wat ons wil nie, doen wat ons wil nie.

 

GENOEG! Genoeg pyn, genoeg trane, genoeg lyding, genoeg beheer, beperkinge, onregverdige regverdigings, terreur, marteling, verskonings, bombarderings, slapelose nagte, dooie burgerlikes, swart herinneringe, troostelose toekoms, hartverskeurende hede, versteurde politiek, fanatiese politici, godsdienstige stront, genoeg gevangesetting! ONS Sê STOP! Hierdie is nie die toekoms wat ons wil hê nie! Ons wil vry wees. Ons wil ‘n normale lewe kan lei. Ons wil vrede hê.

 

Is dit te veel gevra?

  •