Posts Tagged ‘Gus Ferguson’

Louis Esterhuizen. Snykant van die spotprent

Wednesday, May 23rd, 2012

Met al die gefladder rondom Brett Murray se skildery wat ons president as umkhonto van die nasie uitbeeld, herinner dit ‘n mens sterk aan die snykant wat die kunste wel (nog) het om te bied. En natuurlik is dit die spotprent wat hom juis by uitstek hiertoe leen. (Soos Zapiro, en vele ander soos Anton Kannemeyer, natuurlik al menigmaal gedemonstreer het.)

Nietemin, die New Yorker het onlangs met ‘n nuwe blog genaamd “Page-Turner” begin en om dié geleentheid te vier, het hulle die spotprentredakteur, Bob Mankoff, genooi om sy gunsteling literêre spotprente wat oor die jare jeen by New Yorker verskyn het, te kies en te plaas.

Van hulle is die volgende:

 

 

Uiteraard herinner dit ‘n mens sterk aan ons eie Gus Ferguson, in sy eie reg ‘n meester van die literêre sportprent en boonop satiriese  digter.  Wie kan ooit die uiters vermaaklike publikasies soos Light verse at the end of the tunnel (David Phillip Publishers: 1996), Arse Poetica (Kwela: 2003), Waiting for Gateau (Double Storey: 2004) en Dubious delights (Quartet: 2006) vergeet?

Soos die volgende wysheid, byvoorbeeld:

You cannot cage a poet

in a prison or a zoo

because, before you know it,

they’ll write about that too.

(Uit: Arse poetica, 2003)

 

En, by wyse van groet, twee van Gus Ferguson se spotprente hieronder.

 

 

(c) Gus Ferguson

 

 

 

Gus Ferguson vereer deur SA English Academy

Monday, August 17th, 2009
Gus Ferguson & Barbara Basel

Gus Ferguson & Barbara Basel

Dit is met volslae genoegdoening dat ek op Book Southern Africa se webblad lees dat die SA English Academy Gus Ferguson vereer het met hul hoogste toekenning vir sy bydrae tot die handhawing en bevording van Engelse poësie in Suid-Afrika. Was daar al ooit ’n meer verdienstelike ontvanger van ’n toekenning as juis Gus Ferguson?! Hierdie selfverklaarde “president of the Snail Liberation Army” het met sy vele publikasies en inisiatiewe reeds aan honderde digters ’n heenkome gebied. Van sy publikasies sluit die tydskrifte SlugNews en Carapace/Karapaks in, asook uitgewerye soos Snailpress, Firfield Press, Carapace Poets en die Unpublished Manuscript Press, wat hy alles vanuit sy huis in Plumstead bedryf het. Die afgelope jare was Gus ook betrokke by handelsmerke van Kwela en Umuzi-uitgewers.

Barbara Basel, wat die goue medalje aan Gus Ferguson oorhandig het, het onder andere die volgende te sê gehad: “Publishing poetry is not a lucrative business, (yet) Ferguson serves for reasons other than the hope of gain. Without his inspirational contribution, South African poetry in English and South African poets would not be where they are today”. Drie digters het ook tydens dié geleentheid verse ter ere van Gus voorgelees, te wete Hugh Hodge, Geoffrey Haresnape en Ken Barris. En, eie aan Gus, het hy sy dankwoord met ’n tipiese Ferguson-vonkel ingelei: “When Robert Graves was asked whether there was any money in poetry, he replied, ‘No, but there’s not much poetry in money either.'”

Ook ons salueer hierdie besonderse mens met dank vir wat hy as Engelssprekende selfs vir die Afrikaanse digkuns doen. Mag jou geliefde slakke nooit uitdroog of verlore raak nie, Gus!

As toegif vanoggend, een van Gus Ferguson se spotprente hieronder. En mag die melancholie hierdie week jou getroue bondgenoot wees … (Dit help glo met die maak van gedigte!)

Mooi bly.

LE

Melancholic

Melancholic

(c) Gus Ferguson

  •