Posts Tagged ‘Hannes Visser gedig’

Hannes Visser. Belastingpligtige

Thursday, March 3rd, 2022

 

Belastingpligtige

 

11:49

goeiedag, ek wil graag …

to submit a return press one

… press four  press six  … press nine

dalk antwoord iemand by tien

… hysbakmusiek

 

12:04

you are number 933 …

mense by staatshospitale en

binnelandse sake en mcdonalds

in die stad kry nommers

… hysbakmusiek

 

12:27

you are number 873 …

my weermagnommer het met 73 begin

ek was 16, veilig in standerd agt, goddank

maar Wally was nie so gelukkig nie

… hysbakmusiek

 

12:31

You are number 747 …

die boeing was die helderberg

140 passasiers en 19 bemanning

geen oorlewendes

… hysbakmusiek

 

12: 56

You are number 660 …

my haarkapper lees angel cards voor die tyd en sê

kaart 660 is faith en benevolence van die universe

my hare getuig sy’t weer iets gerook voor die knip

… hysbakmusiek

 

14:09

You are number 119 …

twee vliegtuie twee wolkekrabbers

ek was toe al drie maande werkloos

en die televisie was toevallig aan

… hysbakmusiek

 

14:17

Good afternoon, how may I …

knipoog selfvoldaan vir die hond

haal diep asem, kies die regte woord

your call limit has been reached

please recharge your account

 

© Hannes Visser, 2022

 

 

Hannes Visser. Nagwaak

Tuesday, March 1st, 2022

 

 

 

Nagwaak

 

die weerlig verblind die spieëls

en ek begin tel

duisendeneen

duisendentwee

duisendendrie

duisenden

die knal sweepslag en rammel weg

 

“meer as ‘n kilometer, ons is veilig”

sou ek gesê het terwyl ek die kombers

vir die soveelste keer om jou lyf vou

en jou voorkop soen

 

“onthou van die honde”

sou jy vir die soveelste keer herinner

en ek sou vloer toe wys waar hulle

met vlak asems op jou bedmatjie lê

 

die weerlig verblind die spieëls

duisendeneen

duisendentwee

duisendendrie

duisenden

ek wonder hoeveel sekondes

in twee en twintig maande is

 

 

Hierdie gedig – ’n inskrywing vir die jaarlikse AVBOB Poësiekompetisie – is in die AVBOB Poësiebiblioteek gepubliseer, en word herpubliseer met toestemming van die AVBOB Poësieprojek. Klik hier om toegang tot meer as 17 000 gedigte in al 11 amptelike Suid-Afrikaanse tale te kry: https://www.avbobpoetry.co.za/Poem/ViewAll

 

Hannes Visser. Visvang

Thursday, November 11th, 2021

 

Visvang

 

‘n visserman van Germiston

vra soos ‘n getroue christen

die seën op elke gooi

vir die siel van sy prooi

toe vang hy ‘n Ford se piston

 

© Hannes Visser, 2021

 

Hannes Visser. Saartjie

Thursday, November 11th, 2021

 

Saartjie

 

Saartjie Botha van Randfontein

se lyf was glad nie fyn en klein

sy het vir Koos gevang

maar dit maak hom bang

toe hy hoor sy’s rofstoei getrein

 

© Hannes Visser, 2021

 

Hannes Visser. Bobbejaanstreke

Thursday, November 11th, 2021

 

Bobbejaanstreke

 

die bob’jane van Bettiesbaai

het Bertus sommer baie kwaai

sy vrou sê gaan koop ‘n hond

nee sê hy ‘n hond loop rond

al wat werk is ‘n moerse haai

 

© Hannes Visser, 2021

 

Hannes Visser. Die burgemeester

Saturday, July 11th, 2020

 

Die burgemeester

 

Goliat met ‘n goue ketting

op sy koalisietroon, oorweeg

opsies links en regs en maak

somme op en somme af

want,

om ‘n dorp te lei is

‘n lonende taak

 

Goliat wissel van party, glimlag

al die pad na die bank, maar

dan raak die taak net te erg

want,

‘n goue ketting is veels te swaar

vir ‘n politieke dwerg

 

© Hannes Visser, 2020

 

Hannes Visser. Covid-internering

Tuesday, May 12th, 2020

 

‘n verweerde bank en ‘n lazyboy voor ‘n telefunken-televisiestel

en tretchikoff se green lady  langs ‘n verbleikte slag van bloedrivier

‘n enkelbed en eendeurkas agter ‘n gordyn in die hoek

 

‘n vergeelde ketel, ‘n tweeplaatstoof en ‘n stil yskas

drup ‘n  waterspoor oor deurgetrapte bruin linoleum

‘n bottel handy andy en ‘n bloublokkievadoek op ‘n rak

 

‘n tandeborsel, ‘n waslap en skyfie lifebuoy-seep

twee skeefgetrapte pantoffels en ‘n deurgewaste japon

‘n bad met koue water en

Dood

se stilte

 

© Hannes Visser, 2020

 

Hannes Visser. Asemhaal

Saturday, April 25th, 2020

 

(Covid-19 Italië)

 

Asemhaal

 

‘n verpleër haas na die man op bed een vier nege wat

met ‘n onbeholpe hand woel aan die masker op sy gesig,

veilig toegekokon in ‘n wit ruimtepak vra die verpleër

sonder om aan die ou man te raak “qual è il problema?”

 

flou vaal oë draai na die venster “la terra respira” en

‘n krom hand wys na die ongekende blou oor die stad

en die vlerkpalet van twee skoenlappers teen die ruit

en die verpleër knik “si, die aarde haal weer asem…”

 

© Hannes Visser, 2020