Posts Tagged ‘Hantamhuis’

Andries Bezuidenhout. Calvinia se Boekehuis

Thursday, January 7th, 2010

Hoe moet ʼn huis lyk waarin ʼn mens kan skryf? Dit moet boekrakke hê. Daar moet woordeboeke wees. Die HAT. ʼn Tesourus. ʼn Entimologiewoordeboek. ʼn Paar tweetalige woordeboeke – Afrikaans-Engels en Afrikaans-Nederlands. Daar moet ʼn kombuis wees, waar jy koffie kan brou en hawermoutpap kan stook, met heuning en geroosterde amandels. Daar moet kaas wees en ingelegde groen vye. Natuurlik ʼn lessenaar met ʼn stoel wat lyk of dit sal kraak as jy daarop sit, maar nie kraak as jy daarop gaan sit nie. ʼn Sonkamer met ʼn dagbed. ʼn Donker kamer met ʼn katel.

Met ons rit deur die Karoo het ons in Calvinia oorgeslaap, in ʼn buitekamer waarin Gert Vlok Nel se oom blykbaar lank gelede gewoon het. Saam met ʼn hele rits nagmaalkamers is dit in die agterplaas van een van die gerestoureerde geboue wat deur die mense van die Hamtamhuis aan toeriste verhuur word.

Op dieselfde werf is Rona Rupert se huis, asook die Boekehuis, waarin skrywers van die Karoo, of skrywers wat oor die Karoo skryf, gehuisves word. Ek het om die Boekehuis gestap. In die een hoek van die erf staan ʼn rits kokerbome. Dan is daar ʼn hele aantal vyebome. By die kombuisdeur staan twee suurlemoenbome tussen bosse roosmaryn. Ek weet nie hoe die huis binne in lyk nie, maar die tuin lyk beslis soos die tuin van ʼn skrywershuis moet lyk.

  •