Posts Tagged ‘Hendruk J Botha liefdesgedig a la Neruda’

Hendrik J. Botha. Tonight I can write the saddest lines

Thursday, November 4th, 2021

 

Tonight I can write the saddest lines

 

So leer ek by jou in die najaar van die liefde:

dat géé saliger is as ontvang,

ekstase vlietend is, dikwels laatmiddag

skuilplek soek in die skadu van verlies,

dat liefde vreesloos is, want elke “happily forever after”-sprokie

word uiteindelik besleg rondom ‘n graf.

So leer ek by jou in die najaar van die liefde.

 

Maar soos die sonvlekke op my hande

gaandeweg verdonker, ek elke dag

met minder vuur en veerkrag stap,

drif tot net ‘n hersenskim vervaag

kneus die tyd liefde tot ‘n inniger skakering,

maar sagter as in die lente van ons jeug.

So leer ons in die najaar van die liefde.

 

© Hendrik J. Botha, 2021