Posts Tagged ‘Hengelo’

Breyten se segetog duur voort …

Wednesday, July 8th, 2009
Breyten Breytenbah (skildery)

Breyten Breytenbah (skildery)

Dit wil voorkom asof Breyten Breytenbach se segetog deur die Nederlandse media nog nie naastenby ten einde gaan loop nie. Soos reeds met Nuuswekker van 12 Junie berig is, vind daar in Hengelo ‘n omvattende huldigingsfees vir sy 70ste-verjaarsdag plaas. Hierdie fees, wat nog tot 26 Julie duur, het as hooffokus Breyten se skilderye van die afgelope 40 jaar, plus tien nuwe sonnette wat almal met die tema “engel” (soos verberg in die naam “Hengelo”) te make het, en op verskillende plekke in die stad aangebring is; teen geboue en onder in duikweë. Op die webblad van Trouw is ‘n uitgebreide artikel geplaas oor die lewe en werk van Breyten. (Die berig kan hier gelees word.) Voorts berig ons korrespondent in Gent dat daar reeds etlike artikels (soos in De Groene Amsterdammer en Vrij Nederland, byvoorbeeld) verskyn het en dat Raakruimtes, die titel van dié fees, sommer baie aandag trek. (Lees ook Charl-Pierre Naudé se blog-inskrywing waarin hy kortliks na hul voorlesing tydens dié besonderse geleentheid verwys …)

Die volgende vrae kom egter onwillekeurig by ‘n mens op: Wat word hier ter lande gedoen om dié besonderse mylpaal van een van ons héél grootste digters te vier? En wie se taak is dit om inisiatief hiermee te neem? Waarom so vinnig met kritiek en so traag met handeklap? Vinnig-vinnig fladder my oog deur die Groot Verseboek en ek merk dat Lina Spies (sowel as Wopko Jensma – waar hy ook al mag wees) ook hierdie besonderse mylplaal vanjaar behaal. En verlede jaar was daar Jeanne Goosen en enkele jare gelede Adam Small, Wilma Stockenström, Pirow Bekker, IL de Villiers, Hennie Aucamp en Petra Müller … Het hierdie digters nie verdien om op ‘n gróót verhoog vereer te word vir hul onderskeie bydraes tot ons digkuns nie?!

Ek vra maar net – want, ai, die gaping tussen die ideaal en die realiteit lê só wyd verfrommel in ons literêre snippermandjie. (Jammer vir die verwarde beeldspraak, maar die versoeking was gewoon te groot.)

Nietemin, kom ons klap hande vandag. Vir wie ook al; wáár ook al.

Mooi bly.

LE

Vrydag, 12 Junie 2009

Friday, June 12th, 2009

Breyten Breytenbach

Breyten Breytenbach

Hierdie naweek is alle oë op Hengelo in Nederland waar hul fees vanjaar op die kuns van Breyten Breytenbach fokus. Die Raakruimtes-fees, wat van 14 Junie tot 26 Julie duur, bestaan naamlik uit veertien nuutgeskryfde sonnette deur Breyten (in Afrikaans) wat verspreid deur die stad op mure geverf is; ’n spesiale poësieroete – met aforismes as rigtingwysers – lei dan die besoeker vanaf die stasie na dié gedigte, asook die drie lokale waar Breyten se kunswerke vertoon word. Verdermeer sal HC ten Berge ’n lesing oor Breyten se digkuns lewer by die Beursplein se Openbare Biblioteek te Beursplein, tesame met ’n uitstalling van al sy boeke … Die hooffokus is egter Breyten se werk as skilder, met ’n uitstalling waartydens bykans al sy werke van die afgelope veertig jaar te sien sal wees, bestaande uit twee-en-twintig grootskaalwerke, ’n reeks etse en gemengde media, asook tien nuwe doeke wat kuns en poësie op ’n speelse manier by mekaar betrek. In totaal sal daar meer as een honderd werke uit die kwas van een van ons mees vername digters te sien wees. Boonop word ’n spesiale uitgawe van die plaaslike koerant met ’n sirkulasie van 10,000 in die vooruitsig gestel.

 

Maar dit is nie al nie – die organiseerder het ook bekend gemaak dat Gert Vlok Nel en Charl-Pierre Naudé op 17 Junie saam met Breyten sal optree in die Raboteater. Musiek sal deur Jeroen van Vliet verskaf word terwyl die bekende Amsterdamse podiumdigter,  Krijn Peter Hesselink, sal probeer om darem ook ’n Nederlandse kleurtjie tot dié Afrikaanse segetog by te dra. (Gaan lees die amptelike persverklaring hieren die berig op Hengelo se webblad hier.) Ai, wat ‘n geleentheid!

 
 

 

As verdere toegif vanoggend, dié pragtige reëls in Nederlandse vertaling uit Breyten se nege landskappe van ons tye bemaak aan ‘n beminde.

 

Laat die naweek dawer van vreugde! Nuuswekker hervat weer Maandag.

 

Mooi bly.

 

LE

 

 

de maan is gevallen en de sterren
zijn gesnoten, vogels deftig in grijze
feesttooi uiten een haastige groet van
zilveren olijf tot groene kurkeik. bij Don Ve cino
kraait een bantammer onder de lege vijgenboom,
wijd en veel verder naar het noorden, dicht bij de
grens

 

(c) Breyten Breytenbach  

 

  •