Hennie Nortje. Bleshoenders
Friday, May 22nd, 2020
Die bleshoenders sleep
steeds slykgrasse aan.
Sagte groenigheid
om nes mee te maak.
Sodat die suidewind
vir altyd hierna,
‘n gefladder
en geplas
oor hierdie waters
aan kan dra.
Oupagrootjie
het destyds
‘n keerwal hier
oor die spruit
laat gooi.
Oupa en Pa
het sy bousel agterna
herhaaldelik verhoog;
oor die jare
slik uit bly bagger,
sodat ons lei-vore
die oewers al wyer
kon vergroen.
Drie geslagte se bleskoppe
rus reeds in die koeltes
onder die damwal.
Ons en die watervoëls
bly die oumense
immer dankbaar.
© Hennie Nortje, 2020
