Posts Tagged ‘HF Nortjé gedig’

H.F. Nortje. Ficus sycomorus

Saturday, March 5th, 2022

 

Ficus sycomorus

 

Elke seisoen se vye

is oneetbaar vol wespes.

Slegs groen papegaaiduiwe

en raserige blou-ape

raak ooit oor sulke

versuurde vrugte gaande.

 

Boonop is die hout

hopeloos te sag

vir meubelmaak.

En sou mens vuur

hiermee wou stook,

brand jou kole vroegaand

alreeds uit tot as.

 

Snags loop ek eerder wye draaie

om so ‘n welige blaredos,

want luiperd se kind kan haarself

alte maklik êrens hier bolangs skuilmaak.

En aan die oewers waar jou soort

so graag groenvoet in die water staan,

jag sluwe krokodille gereeld

in die skadu’s langs.

 

So watter nut dien jy

dan Sycomorus?

Wat anders as om vir ‘n oomblik

teen skemer

koekepanne vol goud

uit die son te myn,

om bloot vir vertoon,

‘n oomblik in die oë

van dromers

t’rug te kaats.

 

Boonop verbeel jy jou

jy is Atlas van die savannas,

want met magtige takke

hou jy kastig die ganse gewelf

omhoog bo jou gestalte.

 

Rusbank vir die silwer rondings

van die maan,

hoor ek jou vanaand

hier langs die Sabie

self aan die sterre vroetel –

so hovaardig, hoe verwaand.

 

Laeveldse vy, wag maar,

eendag kom ry ‘n honger jong man

op sy donkie

ook onder jou verby

en dan …

 

© H.F. Nortje, 2022

 

HF Nortjé. Die Ruiter in Swart galop voort

Sunday, September 5th, 2021

 

 

 

 

Die Ruiter in Swart galop voort

 

Hy was die held van die oomblik:

Die skurke een en elk klaar gestraf,

sit hy nou fier op sy hings

en buk ver na haar af.

Slegs ‘n blitsige piksoen

op haar betraande wang

en daar galop hy

in ‘n stofwolk

sonder omkyk

met die langpad af.

 

Maar vanaand weer eensame

en alleen by sy vuurtjie,

staar hy stip na die vlamme

en dink aan die pragtige meisie

wat in aanstaande maand

se fotoverhaal wag.

 

© HF Nortjé, 2021