Posts Tagged ‘Innibos’

Andries Bezuidenhout. Johann Lodewyk Marais as feesdigter – fotobeeld

Wednesday, July 3rd, 2013

Johann Lodewyk Marais was die eerste Afrikaanse digter om as die Innibos kunstefees se feesdigter aangewys te word. Tydens ʼn geleentheid by die fees is ʼn oorkonde deur Chris Barnard aan hom oorhandig. Elize Cawood het gedigte uit sy agt digbundels voorgelees en ʼn oorsig van sy loopbaan as digter gegee. Luna Paige het twee van sy gedigte getoonset en by die geleentheid opgevoer. Verder het die beeldhouer Jaco Sieberhagen ʼn werk geskep op grond van temas uit Johann Lodewyk Marais se digkuns en daaroor gepraat by die geleentheid. Hier onder is ʼn fotobeeld.

Johann Lodewyk Marais ontvang oorkonde tydens Innibos Kultuurfees

Friday, June 28th, 2013

 

Verlede maand het ons berig dat die organiseerders van die Innibos-kultuurfees die inspirerende besluit geneem het om ‘n feesdigter in die persoon van Johann Lodewyk Marais aan te wys. Sy optrede was vanoggend, 28 Junie, en na afloop van sy voordrag is hy vereer met ‘n spesiale oorkonde wat aan hom oorhandig was deur niemand minder nie as Chris Barnard …

Watter welverdiende verering is dit nie! Van harte geluk, Johann.

As leestoegif volg ‘n toepaslike gedig.

***

INNIBOS

Drie vroue dans ‘n Vrydagles
toe-oë, in capulanas
wat rooi en swart en plegtig pas
en die ritme van hulle dye hou.

“Hý wou sien,” sê Dan Dlamini
en sy vinger wys na my
wat volg hoe die vroue stof trap
in ‘n besielde raserny.

Die aanstigter slaan op ‘n trom:
al skriller en meegevoer
skuifel die voete uit die kring
en word die ritueel volvoer.

 

© Johann Lodewyk Marais

 

 

Johann Lodewyk Marais aangewys as feesdigter vir Innibos se 10de verjaarsdagviering

Monday, May 13th, 2013

 

Nelspruit se Innibos-kultuurfees vier vanjaar hul 10de bestaansjaar en om dié geleentheid nog daardie tikseltjie ekstra plesier te gee, is dit die afgelope naweek bekend gemaak dat Johann Lodewyk Marais as feesdigter aangewys is. Die aanwys van ‘n feesdigter is natuurlik wêreldwyd ‘n algemene instelling met feeste, maar na die beste van my wete is dit die eerste keer dat daar ‘n fees hier ter plaatse is wat dié prysenswaardige stap neem.

En wie beter as Johann Lodewyk Marais?! Veral met ‘n fees soos Innibos waar hy met sy besonderse aanslag en tematiek soos ‘n loerie in die bos nommerpas vir dié feestelikheid gaan wees …

Volgens die berig wat in Beeld verskyn het, die volgende: “Benewens gedigte wat hy (Marais) spesiaal vir die fees geskryf het, sal hy op Vrydag 28 Junie om 11:00 ook in ’n program optree saam met Andries Bezuidenhout, Elize Cawood en Luna Paige. Bywoning is gratis, maar daar is slegs 100 plekke beskikbaar. Die geleentheid word aangebied by die Stoep-restaurant, net langs die feeskantoor. Cawood sal tydens die geleentheid van sy gedigte voorlees en Bezuidenhout sal ’n onderhoud met hom voer. Die program sal afgesluit word met Paige wat toonsettings van sy werk sal sing.”

Vreemd genoeg kon ek nêrens op Innibos se amptelike webtuiste iets van hierdie vreugde te lese vind nie; tensy ek rakelings gekyk het, natuurlik. ‘n Mens kan maar net hoop dat hulle nog daarby sal uitkom om die groot klok uit die stoor te haal en ordentlik blink te vryf vir dié feestelikheid. Die volgende aanhaling uit die organiseerders se feesbrief reflekteer darem in ‘n mate tog hul ingesteldheid: “Feeste het toenemend belangrik geword vir die ontwikkeling en voortbestaan van alle genres van kuns – veral in Afrikaans. Verder speel feeste ook ’n baie belangrike rol om Afrikaans as taal en ons kultuur te bevorder en te ontwikkel. Dit dien as platform vir kunstenaars om hulle kuns uit te leef en ook hul brood en botter te verdien.”

Vir jou leesplesier volg ‘n gedig van Johann Lodewyk Marais; ‘n gedig wat hy ‘n week of wat gelede op sy FaceBook-profiel geplaas het.

*

INNIBOS

Drie vroue dans ‘n Vrydagles
toe-oë, in capulanas
wat rooi en swart en plegtig pas
en die ritme van hulle dye hou.

“Hý wou sien,” sê Dan Dlamini
en sy vinger wys na my
wat volg hoe die vroue stof trap
in ‘n besielde raserny.

Die aanstigter slaan op ‘n trom:
al skriller en meegevoer
skuifel die voete uit die kring
en word die ritueel volvoer.

 

© Johann Lodewyk Marais

 

 

Andries Bezuidenhout. Oopmond, Nelspruit, in beeld

Tuesday, October 5th, 2010

Elke keer besluit ek voor die tyd dis die laaste keer wat ek dit doen en elke keer is ek na die tyd lus om dit weer te doen.

Ry Donderdagoggend by die lughawe verby om vir NP van Lykskou, ook bekend as Danie Marais, op te laai. Ry deur die Hoëveld, verby die kragdrade, mynhope, later net grasvelde, heuwels met koue damme en koeie wat stram wag vir die somer se eerste reën. Dan sak ons af Laeveld toe, verby Mbombela-sokkerstadion, tot in Nelspruit. Boek by die hotel in, vind ʼn kroeg oorkant die pad waar ons solank ʼn slukkie Jack Daniels en splinters ysberg kan kry.

Een vir een sluit hulle aan. Die seremoniemeester: Hoerneef (Melt Sieberhagen). Die digters: Joe Moer! (Johannes Prins), Breyten Lykverdag (Niel van Deventer), Rene Renaaisaans (Rene Bohnen). Ek (DJ Stotterman) en NP van Lykskou (Danie Marais) is reeds daar. Die musikante: Erik Klaphom (Nardus du Plooy), Steve Vaierband (Jaco Lotter) – beide van Die Kaalkop Waarheid, of DKW; en Kort Derm (Dawie de Jager) en Elvis Prinsloo (John-Henry Opperman) – van Klopjag. Heel laaste kom Ingrid Dronker (Ronel Nel), wat die hele konsep aanmekaargeslaan het, en Sheila Concussion (Charlene McKenzie), ons tellinghouer.

Dis heel eenvoudig. Twee spanne digters kry onderwerpe uit die gehoor om kitsgedigte van te maak. Hulle kry tien minute. Dan kry die musikante twintig minute om van die gedigte te toonset. Die gehoor stem vir watter span moet wen. Die resultaat – baie pret, ʼn paar nuwe gedigte en twee nuwe songs. Alles binne die bestek van bietjie langer as ʼn uur.

Ons debrief by Aardklop. Ingrid Dronker wonder of sy nie beeldende kunstenaars ook moet betrek nie. Ek dink dis ʼn uitstekende idee!

"Voel Die Zen", of so iets...

Voel Die Zen, of so iets...

 

NP van Lykskou lees en Joe Moer! lag

Hoerneef hou al die lyne vas.

Kort Derm en Elvis Prinsloo toonset iets oor 'n renoster.

NP van Lykskou lees uit sy ouvre.

Rene Renaaisaans kyk na die berge en Breyten Lykverdag kyk toe.

DJ Stotterman en Ingrid Dronker drink en stotter.

Die foto’s het ek van Oopmond en Rene Bohnen se Facebook sites gesteel. Skaamteloos. Gaan loer hier vir meer.

Andries Bezuidenhout. Oopmond vanaand in Nelspruit

Thursday, September 23rd, 2010

Laevelders kan maar ‘n draai kom gooi by Oopmond vanaad. Dis deel van die Innibos-fees in Nelspruit. Meer besonderhede hier.

  •