Posts Tagged ‘Jannie Malan gedigte’

Jannie Malan. Steurnis

Thursday, March 10th, 2016

Steurnis

.

Oppad na Naudesnekpas

deur die haarnaalddraaie

los en vat die karradio

die FM golwe

asof hulle yl raak in die dun lug

Die omroeper se stem

kondig eens helder ‘n kriekettelling aan

een-en-vyftig sonder die verlies van ‘n paaltjie

verdwyn dan weer

in ‘n gons van statika

om die draai lê vêr onder ons ‘n afgeleë plaashuis

in die holte van ‘n hoefysterrivier

uit stilte hort skielik weer die radio terug

dowwer nou, krakerig

soos uit ‘n tweerigtingradio

beur ‘n tweede sein na bo

‘n plaaslike stasie

spookstemme, onverstaanbaar

Buite die ruite rek skadu’s lank oor die landskap

‘n wolk klik die son se ronde knop

af.

.

© Jannie Malan / 2016

Jannie Malan. Dagblad blues

Wednesday, March 2nd, 2016

Dagblad blues

.

Nog ‘n gesodomiseerde seuntjie |

‘n tiener met vermisde satanshande |

weer die verkragte kleurlingmeisie langs haar eie ingewande |

bejaarde egpare se stukkende gesigte

ketelkoord gewikkel om gewrigte |

deur die plaasvloer se konklusie loop bloederige

toi-toi spore vir land redistribusie |

agter die sportsheld met sy netelige posisie | jaag in ‘n vangwa – verbete – die polisie

met die uitlander, oor slaggatpad gesleep, vir dood

tot by die kinder porno-ring ontbloot |

langs dik politici al smakkend; agter die soustrein – sak-ke-pak-kend |

waar dit ontspoor langs rooi berette | tussen verstopte skooltoilette |

bons die rubberkoeëls en biddende studente by mekaar verby | om rakelings

die vryval van die groeikoers te vermy…

.

‘n oorsig van die naweek se vermaak

sal jy op bladsy sestien van ons bylaag kry

.

© Jannie Malan / 2016

Jannie Malan. Ek stuur vir jou

Thursday, February 25th, 2016

Ek stuur vir jou

Met apologie aan Breyten

 

Allerliefste, ek stuur vir jou geen rooiborsduif nie.

ek stuur vir jou ‘n hommeltuig

wat hoog en ongesiens bo die soldate gaan.

Kyk, my dreun styg op en my dreun sak na neer

en waar hy vlieg sing sy sensors

om die bruin vel van jou gesig af te tas, te konstrueer

en teen sy globale databasis te verifieer.

Ek gord jou liefde om my buik

en steek die gewig daarvan

onder ‘n t-hemp en ‘n baadjie weg,

want jou liefde reis soos ‘n lyfbom met my mee.

Jou liefde moet by my bly soos die vurige asem van ‘n djinn

Ek en al my onskuldige omstanders moet van jou liefde weet

‘n vuurstorm van skrapnel wat ek met my vingers kan ontsteek.

 

 

© Jannie Malan / 2016

 

  •