Joha van Dyk. ek sien jou in kerkstraat
Tuesday, January 4th, 2022
ek sien jou in kerkstraat
jou hande in jou baadjiesakke
ek wil vir jou vertel
van die geel chev
net ’n straat weg
hoe ek hom wil bestuur
vensters afgedraai
met jou langs my
hoe ek my vingers deur jou krulle wil trek
vir jou wil vertel
van werk
of my week
of een of ander artikel
waarvan ek skaars
kan sin maak
nes jy
maar ek stap
alleen
ek sien jou in die verbygaan
’n spook
hande in jou baadjiesakke
langs die chev
verby
ek soek jou steeds
altyd
in kerkstraat
© Joha van Dyk, 2022
