Posts Tagged ‘Johann Lodewyk Marais haikoes’

Johann Lodewyk Marais. Sewe haikoes

Monday, April 11th, 2022

 

Sewe haikoes

 

I

 

In die fakulteit

van my gedigte lewe

fauna en flora.

 

II

 

Risoom behou glo

die idee van geworteld

met ’n wortelstelsel.

 

III

 

Olifante dwaal

deur my gedigte en loop

en breek bome af.

 

IV

 

Die kort-kort en lang

plaaslyne van die voëls

weerklink oor die werf.

 

V

 

Die wildepiesangs

voor die sitkamervenster

blaai terug winter toe.

 

VI

 

Die afgesaagde

naboom het in sy spinthout

’n volmaakte ster.

 

VII

 

Ek lees Ezra Pound

in die trein en sien druppels

op die vuil blare.

 

 

© Johann Lodewyk Marais. 2022