Posts Tagged ‘Johann Lodwyk Marais gedig’

Johann Lodewyk Marais. Dhow-wedvaart, Lamu

Wednesday, November 30th, 2011

DHOW-WEDVAART, LAMU

‘n Gesoute seekaptein ken sy dhow
en van jongs af die name van die wind.
Tydens die wedvaart gee hy net meer tou.

Romp en mas is op die eiland gebou,
wat die deelnemers aan dié ambag bind. 
‘n Gesoute seekaptein ken sy dhow.

Tien bemanningslede sny die diepblou
branders om die wenstreep te kan vind.
Tydens die wedvaart gee hy net meer tou. 

Soms as jy praat, luister die boot na jou
en skiet vooruit sodat die toue kwint.
‘n Gesoute seekaptein ken sy dhow.

Vandag moet iedereen verbete klou 
wanneer die sproeireën hulle verblind.
Tydens die wedvaart gee hy net meer tou.

“Gooi water dat die seil hard word, en hou!”
spoor hy aan. “Op die kaai waai vrou en kind!” 
Tydens die wedvaart gee hy net meer tou.
‘n Gesoute seekaptein ken sy dhow.

 © Johann Lodewyk Marais. 2011

  •