Posts Tagged ‘Katie Price (Jordan)’

Rondborstige en “plat” karakters

Thursday, November 5th, 2009
Katie Price (Jordan)

Katie Price (Jordan)

Verlede maand het Nuuswekker berig dat Katie Price (Jordan) se meerdelige outobiografie, Pushed to the limit, die boek is wat die meeste agtergelaat word in die hotelgroep Travelodge se 7,200 kamers. Pas het sy egter wéér die koerante gehaal toe die vrypostige skrywer Martin Amis (De Papieren Man verwys na hom as ‘n “woelwater”) bekend gemaak het dat hy dié rondborstige model as karakter by sy nuutste roman, State of England, ingeskryf het. Tydens die pasafgelope Hay Festival in London het hy sy voorneme ten gunste van Price as roman-karakter soos volg gemotiveer: “She has no waist, no arse … an interesting face … but all we are really worshipping is two bags of silicone.”

Hierdie aankondiging deur Amis volg kort op die hakke van die misdaadskrywer Lynda La Plante se onverbloemde aanval op Price tydens die oorhandiging van die Specsavers Crime Thriller Awards toe sy uitgevaar het teen die buitensporige bedrae geld wat deur uitgewers aan glanspersoonlikhede soos Price voorgeskiet word om hul knoeisels, waarna sy as “trite tripe” verwys het, te skryf. “Katie Price’s book outsold the Booker Prize list. She’s a terrible thing for young girls who just want pink welly boots,” het sy volgens The Telegraph se beriggewer gesê. Hiermee het La Plante glo verwys na die feit dat Price se tweede roman, Crystal, meer kopieë in 2007 verkoop het as die res van die boeke op Booker-prys se kortlys tesame. Verdermeer is sy verlede jaar in Desember genooi, nogals as genomineerde “Reading Hero”, om die premier te Downing Street 10 te ontmoet. En vroeër vanjaar was sy boonop deur The Bookseller Magazine aangewys as een van die 100 mees invloedryke persoonlikhede in die Britse boekbedryf.

In sý reaksie het Martin Amis na die plakker “Number One bestseller” op Price se boekomslae verwys en gesê dat hy dáárdie betiteling meer skrikwekkend vind as enigiets wat jy in haar boeke te lese kan kry … Nogtans is hy blykbaar vas van voorneme om die geykte klassifikasie van “ronde” en “plat” karakters heeltemal op sy kop te draai deur ‘n plat karakter met beduidende borsmaat te skep … (Of is dit “bruikleen”?)

Nou ja, toe. Maar watter toepaslike vers sal ek ten gunste van jou leesplesier vanoggend kan meegee? Aaa-a-a, natuurlik Koos Kombuis se “Dronk liefdesvers”. Hoe dan anders?! Dit is immers sy verjaarsdag vandag. Veels geluk, Koos. Mag daar sommer baie vreugde wees in jou huis vandag.

***

Ter afsluiting vestig ek graag jou aandag op Bernard Odendaal se resensie van Cas Vos se bundel “Intieme afwesige” wat gister geplaas is, en ook Andries Bezuidenhout wat met sy nuutste blog-aflewering nostalgies raak oor Afrikaanse musiek en die weermag na aanleiding van die End Conscription Campaign se makietie verlede naweek.

Lekker lees en hou tog die dinge bymekaar.

Mooi bly.

LE

 

Dronk liefdesvers

 

my begeerte is

‘n vrou wat l&m rook

en alles verstaan

 

met lang slanke bene

‘n maklike bankrekening

vriende oorsee

en twee ouers

(skatryk en feitlik gedaan)

 

ek sal haar dag en nag spring

ek sal vir haar gedigte bring

 

sy sal klein van postuur wees

sy moet iets nuuts in die afrikaanse kultuur wees

ek sal vakansies met haar gaan hou

haar in die riviera gaan afshow

‘n studeerkamer vol boeke om haar bou

 

soos ‘n huisie by die see

met prints van chagall

en originals van christo coetzee

ons sal dae deursit op nieblanke strandoorde

tot sy moeg raak vir my woorde

 

eendag

kry ek haar nog

(watch my tog)

brigitte brigitte

gee my jou tiete

dan leen ek jou my hande

 

© Koos Kombuis (Uit: Die geel kafee, 2003: Protea Boekhuis)

 

Vergeetagtigheid of vergeetlike boeke?

Friday, September 18th, 2009
Katie Price (Jordan)

Katie Price (Jordan)

Onlangs het die Britse hotelgroep Travelodge hul statistiek ten opsigte van “agtergelate boeke” boeke bekend gemaak. Hiervolgens word rekord gehou van die boeke wat gaste liewerster in hul kamers “vergeet” as om die verder op hul lewensreis saam te piekel. Interessant genoeg was die boek wat loshande die meeste agtergelaat word in die hotelgroep se 7,200 kamers die model en gepaardgaande “glanspersoonlikheid” Katie Price (Jordan) se outobiografie, Pushed to the limit. Die boek in die tweede plek is ietwat van ‘n verrassing: Barack Obama se Dreams from my father. In ‘n stewige derde plek volg die komiese aktrise Dawn French, se Dear Fatty.

Nog interessante titels op dié lys van agtergeblewenes is John Grisham se The Appeal (sewende) en J. Randy Taraborrelli se boek The Magic and the Madness by Michael Jackson (negende). (Lees gerus The Telegraph se berig hieroor.)

Godedank, darem géén digbundel nie … Of is die prys van digbundels deesdae gewoon te duur?!

***

Twee interessante toevoegings tot die webblad vanoggend is Mathews Phosa se toespraak wat hy Maandagaand tydens die bekendstelling van Deur die oog van ‘n naald by Hidden Valley buite Stellenbosch gelewer het, asook Louise Viljoen se toespraak tydens die bekendstelling van Breyten Breytenbach se nuutste bundel, Oorblyfsel / Voice over, Woensdagaand by die Breytenbach-sentrum op Wellington. En maak seker dat jy ook Andries Bezuidenhout en Desmond Painter se nuwe blogs raaklees; veral die kommentaar wat Andries onderaan sy blog geplaas het, verdien aandag. Om nie eens van Yves T’Sjoen se insiggewende stuk oor Hugo Claus en vertaling te praat nie …

Lekker lees aan alles en onthou tog om jou boeke in te pak waar jy ook al hierdie naweek mag oornag. Vir jou sardoniese plesier volg Loftus Marais se Gedig vir my Seamus Heaney New Selected poems 1966-1987 hier onder. (Gelukkig het dié boek darem nie vergete iewers agtergebly nie …)

Nuuswekker hervat weer Maandag.

Mooi bly.

LE

Gedig vir my Seamus Heaney New Selected Poems 1966-1987

 

potloodnotas van ‘n vreemdeling wat blyk

katoliek te wees, ‘n koffievlek

‘n verdagte merk op “Digging” wat na ‘n snotkol lyk

‘n spinnekoppie platgedruk op bl. 203 –

o, dis poësie dié

die ganse wêreld is tweedehands te koop

 

die rug van die boek (isbn 0-571-14372-5)

is geplooi en daar val sand

uit die blaaie as ek skud

(god, van watter tuin of park of strand?)

kon ons maar woorde tussen vingertoppe vryf

soos swart stukkies turf

 

die boek in my hand sê woorde is restant –

die swart skeletjies van dooie idees

geperste memento’s van die eerstehandse dinge

 

meneer Heaney, u weet tog een van u moerasse

selfs vol subtiliteit en melodie

kan nie soos modder onder toonnaels vassit nie

 

ons kan jou plekname darem hoor

die wind in “Aarhus” en “Anahorish”

en in “Carrickfergus” die klank van oor nat turf stap

 

maar luister: die wêreld bars

uit alle metrum uit

‘n gedig bly slegs ‘n flou epitoom

meneer Heaney, voel:

selfs dié papier was eens ‘n boom

 

© Loftus Marais (Uit: Staan in die algemeen nader aan vensters (2008: Tafelberg Uitgewers)

  •