Hans du Plessis. KERSBELYDENIS
Friday, December 23rd, 2016
KERSBELYDENIS
Kleine Jesus, mens van Nasaret,
hoor die hemel en die aarde juig
oor redding uit ʼn voerkripbed.
Laat rym en reël nou ook getuig:
Jonge Jesus, seun in Nasaret,
u koms voltooi die ganse wet,
leer van liefde en vergiffenis
in wonderwerk en gelykenis.
Grote Jesus, man uit Nasaret,
U het tot die dood toe bang
aan mensehand moes hang,
en als volbring in kruisgebed.
Liewe Jesus, God oor Nasaret,
u lewe het my van die dood gered!
(c) Hans du Plessis / Desember 2016
Eersterivierstrand
