Posts Tagged ‘Marita McGrath gedig’

Marieta McGrath. Die gepantserdes

Tuesday, March 29th, 2022

 

Die gepantserdes

 

By die ingang van die winkelsentrum staan ‘n wag

met sy geweer, en sy rug na ‘n gepantserde geldwa.

 

Soos altyd onthou ek die dag toe my ma

langs my haar asem skerp intrek –

 

my ma, die plaasvrou wat die stad

net van enkele besoeke ken

 

bevind haar skielik in ‘n rooftog,

in die ewige Suid-Afrikaanse repetisie daarvan,

 

en ek paai, toemaar Ma, dis net

‘n doodgewone afleweringstransaksie,

 

ek het die gepantserde met sy geweer

soos ‘n skewe kruis voor sy bors

 

nie eers raakgesien nie.

Ek steur my nie aan hulle nie.

 

Sedertdien, skaam vir my wêreldwysheid,

neem ek doelbewus notisie,

 

en sedert Oekraïne al hoe meer,

van al die lande waar gepantserdes

 

met skewe kruise staan en niemand

hulle daaraan steur nie.

 

©Marieta McGrath, 2022