Versindaba
~ 'n Weblog vir die Afrikaanse digkuns ~

Stemmingsmusiek

vandag vra vir theodorakis

vir die liedere van mauthausen

vir farantouri

*

bruidegom

haar het ons gesien in die binnehof

geboetseer uit ys

geel ster op die hart

uit die waens onderweg na gusen

*

beledig my nie met behulpsaamheid

vervloekte medelye

maak nie van my jou sisifus

in die stad van mahler

*

here kán ’n hand kouer as hare

in myne

meisie in jou deurweekte jurk

vlug saam met my verby die skoorstene

die veetrokke en die gewere

met monde soos wolfhonde

hoe stil is die lug

bo die oopgekrapte as

as daar ’n god in die hemel is

moet hy hoog wees op zyklon-b

*

verbeel jou dis ’n valsskerm

van die todesstiege praaltrap na die hel

gaan ons val in formasie

vlug van die steengroewe

die hasejag van ’n honderd russe

vir ons is kosiek en haeflinger te laat

© Marius Crous