Versindaba
~ 'n Kollektiewe weblog vir die Afrikaanse digkuns ~

MALEWITSJ 

What the hell is the difference between a painting done by a person who wishes to paint like a child, and a child’s painting? – PATSY STONE

It took me four years to paint like Raphael, but a lifetime to paint like a child. – PICASSO

Malewitsj se rooi huis het drie dakvensters

Malewitsj se kosmos is ’n groen sirkel en twee oranje reghoeke

Malewitsj hou van wit op wit

Malewitsj plaas twee swart vierkante langs twee wittes

Malewitsj noem homself ’n suprematis in die spieël

Malewitsj teken vroue met emmers sillindries

Malewitsj en Majakofskij maak saam propgandaplakkate

$60 miljoen toe $85.8 miljoen vir ’n Malewitsj

’n uitmekaarspat van blou en groen en geel

’n verlate blokkie pienk onder in die hoek

$450.3 miljoen is sinvol vir ’n Leonardo

So ook $250 miljoen vir ‘n Cézanne

Of $39.7 miljoen vir `n vaas sonneblomme deur Van Gogh

Hoekom $69.6 miljoen betaal vir Cy Twombly

se wit krapsels op ’n grys agtergrond

Of $63.5 miljoen vir De Kooning se meetkundespel in geel

Wat is mooi aan Pollock se verfdrupsels

Pragtig aan Picasso se skeefgeslaande gevrete

Gee my ’n miljoen en ek gee jou ’n kartonboks

vol met yskasprente en omkrulblaaie

die kunstenaar se naam krom en skeef

bedek helfte van die blad

soos ’n Malewitsj-parallelogram

© Marius Crous / 2018

… DON’T BOTHER, THEY’RE HERE

eers was hulle fifi feste en tiekie

met rooineuse rooi overalls

rooi housecoats en tobboets

bollemakiesie geslaan

op die tapyt voor die troon

gefluit en gevloek en jollie gedans op die tafel

die ambassadeurs en die adjunkte ge-moon

ons passiewe lot voor ons televisiestelle bier in die hand

hits aan: stroop die keiser van sy stertriem

gee hom ’n onderkaak van polistereen

(betaal die gelag wat die gelag toekom)

vir ons het hulle die winkelpoppe

broek om die enkels gelos die professore

uit hul kantore gedryf die hekke

geketting voor die skole tyres verbrand

ons het uit ons stoel geval

as hulle slapende politici wakker klap

skielik was hulle nie meer snaaks nie

was hulle krusty en pogo en pennywise

wat saam spring uit ’n american horror-bussie

wat hul keppe en doeke en frokkies verruil

vir oprygstewels en opslaankrae

vir clown-maskers van klatergoud

vir die strooptog na die ampstaf

© Marius Crous / 2018

RIVIERE

henryk doop sy toon in die vistula

nes antjie gaan staan het by die gariep

constable het gaan sit tussen die koeie

en eliot se teems stink na teer

almal ken strauss se donou

alle verskoptes ween riviervloeie vol trane

by die riviere van babel

maar oor riviere

kon ek nog nooit liries raak

sin gaan soek onder ‘n boom by die eersterivier

of gaan staan as die klein windhoek afkom

grootmense kinders motors honde saam dam op die wal

saam spring oor die bruin wrong van water

die malende murg in die pype van die dorre stad

nog nooit by die swartkops of die baakens

vasgesteek en saamgesing:

streep silwer rivier my rivier

waarheen die stil gevloei

vanwaar jou waters

ag sê my voor jy in die see verdwyn

© Marius Crous / 2016

æternam habeas requiem

ons het gedag dit sou anders wees

ons hou van spektakels in hierdie land

nie sommer so op ‘n donderdagaand in desember

met die voorstede vol van ribs & wings specials nie

soos met jou voorloper onder sy sjalaboom by kusinagara

tog het ons hare ook gerys

en ook in onreinheid uitgeroep:

te gou, te gou

ons wil jou langer hier hou

o verligte o erbarmer

want met jou weg

draai vriend teen vriend

en skeur ons jou klere

hang die walms

van fantasieë oor vlymlempangas

weer skerp in die lug

© Marius Crous / 2013