Posts Tagged ‘MC Escher gedig’

De Waal Venter. In waansin het ek gevra

Thursday, July 15th, 2021

 

 

“Vlakvulling II” M.C. (Maurits Cornelis) Escher 1957

 

In waansin het ek gevra. NP van W Louw

 (Uit die bundel: Alleenspraak, 1935)

Herr du mein Gott, was gehen mich die
Gesetze der Natur und Arithmetik an?

 

In waansin het ‘k gevra, o God

vir my die vrede van die ster,

om bo die berge stil te woon,

die wêreld onder dof en ver.

 

***

 

In waansin het ek gevra

 

Tuna byt die water in, bo

oor die swaan in die waan dat wit

die kleur is van olifante, al sê die koerante wat

’n kameel swart laat voorkom, nes ’n boeddha sonder

klere rustig by die wit stertvere van

’n haan sonder waan dat hy altyd kan onder-

skei tussen walrus en donker padda leunend teen

die spitse ore van die meisie wie se glim

lag

jou laat in die waan dat

’n vol

struis niks weet van die Recuerdos

de la Alhambra terwyl dit stewig

staan, geplant op die ki-

taar rustend op  die stert van ’n tok

kelossie en ’n trieste tipe pelikaan on-

der ’n ongedierte buigend onder die hand van

die meisie ver maar tog geneties ná

aan die besorgde kreef hang-

end oor die esel wat eens die Mes-

sias hoog deur die skare gedra het in

die waan dat hy net sy werk doen maar

nou weet ons die een vorm die ander, waar

jy lig is, is ek donker om

jou te wys waar dit waar is sodat

jy jou waan beter

kan verstaan.

 

© De Waal Venter, 2021

 

Hennie Meyer. Escher

Thursday, July 15th, 2021

 

 

MC Escher. Guards

 

 

 

Uit: Winkel van wanklanke, 2020

 

Anton Dockel. Saadpluime

Sunday, July 11th, 2021

 

Blowball II 1943

 

Saadpluime

 

Jy antwoord nie meer nie

maar ek stuur nog selfoonfoto’s

 

Van voëls wat wegvlieg– vêr

soos regmerkies oor die see

dit was Valsbaai.

 

Van die Swartland

se canola – lappe geel

vasgespeld met bloekombome.

 

Van stroompies –

Slingers lig wat om klippe deurglip

en teen skemer aanslaan soos ou silwer

dit was Blyderivier.

 

Van die ylheid van dors bossies

tussen vaal gruis, blouklip en roesbruin

in die Moordenaarskaroo

 

Al mag die wind my whatsapps skep,

prentjies wegwaai soos saadpluime

pos ek dit nogtans

êrens mag dalk ’n selfoon pieng

 

 

© Anton Dockel, 2021

 

 

Marcel Spaumer. Al-ewig

Monday, July 5th, 2021

 

 

 

 

Al-ewig

Bond of Union van Martin Escher 1956

 

my koppe draai om jou heen

en weer koek ek jou nek rek

die onderkant van jou ken

tot teenaan my bo-lip oorkant

die val en hang van ’n gesig

agtertoe terug-op

in die lig ligter gedeelte van die voorkop

ver verby

vlieg jy my dog ek dink gedagte deur

’n alewig-sinkroniese rondgeslingerde spoor

ná/na mekaar

 

(moenie nou kyk nie maar hou ons al die balle in ons koppe in die lug)

 

© Marcel Spaumer, 2021

 

 

Joan Hambidge. Waterpoel

Thursday, July 1st, 2021

 

 

 

 

Waterpoel

‘n Houtsnee in 1952

 

Teen skemeruur kyk

jy af in ‘n waterpoel

se terugkaats: ‘n bos,

voetspore van ‘n vermoorde

met die moordenaar weg op sy fiets:

polisie en speurders het glo

die toneel betree, beduiwel:

die liggaam afgetrek

onder oë speurend:

onsienbaar, onsigbaar

dog reg voor jou afgespieël:

met net die maan

as getuie soos water en lug

se dubbelpunt: teen skemeruur.

 

© Joan Hambidge, 2021

 

Bester Meyer. Vir Jetta

Wednesday, June 30th, 2021

 

 

 

 

“I could fill a second life with my work” – MC Escher

 

Vir Jetta

 

ons twee is een

met die onsterflikheid

wat nou al reeds

in ons are

klop

 

om te onthou

is om lief te hê

die blom

van liefde

wat jy vashou

in ons tweeledigheid

 

gister het Mic Jagger

gevra om ʼn afdruk

te gebruik

vir ʼn albumomslag

maar my antwoord

was, nee, my lief

 

ook is ek

nie sy Maurits nie

het ek laat weet.

vir hom is ek:

MC Escher

 

maar vir jou, my lief

is ek die ek

wat ons liefde verstaan

as wiskundige vergelyking

vir jou is ek

Bach se musiek

wat afdrukke teen my

mure agterlaat

 

vir jou is ek

dag en nag

wat een word

soos wit en swart

en vis en voël

 

maar enersyds

is jy ook die ek

wat die blom weet

wat ek in jou

hand

kom neerlê het

 

 

© Bester Meyer, 2021

 

Bester Meyer. Maaiers

Wednesday, June 30th, 2021

 

Oog – MC Escher

 

 

Maaiers

 

elke asemteug

is om

dood te volbring

te vervolmaak −

net ʼn leë gedagte

oor bestaan

 

kyk

is om die ek

in jou

te gewaar

waar hy

onder haar

skedel maai

en die iris dit binne hou

wat uit kan kring

tot die onsterflike

aller-ewige kyker

 

want kyk (is)

die groot gelykmaker

van (is) (asem)

wat die illusie

se wekroep

kristalhelder ervaar

is/in die gewisse skedel-is

 

en om

in en uit

(in)sig te kom

is om die Ek te aai

in jou twee kykers

waar die werklikheid

soms die illusie

van my self

verraai

 

© Bester Meyer, 2021