Posts Tagged ‘Medellin-poësiefees’

Petisie om Medellin-poësiefees te red

Friday, July 10th, 2009
Medellin-poësiefees (Colombië)

Medellin-poësiefees (Colombia)

Nadat Nuuswekker enkele dae gelede oor die Medellin-poësiefees berig het, ontvang ek vandag nuus dat die dié fees met sy 35,000 besoekers – wat hom loshande die gootste poësiefees ter wêreld maak – onder ‘n ernstige aanslag van die Colombiaanse-regering bevind. Dié fees, wat tans in sy 19de bestaansjaar is, word vanweë sy uitgesproke en kritiese aard as ‘n bedreiging vir die diktatorskap in Colombia beskou en dit is veral die hooforganiseerder, Fernando Rendón, wat as “terroris” gebrandmerk en geïntimideer word. Ten einde die fees se voortbestaan te red, is daar verlede Vrydag, met die aanvang van die fees, begin met ‘n petisie wat reeds deur 753 digters vanuit 117 lande onderteken is. Die volgende is ‘n uittreksel uit die verklaring wat hier op hul webblad geplaas is: “In response to the silencing brought on by our present society and by the dictatorship of the media, we develop a massive action of poetic language. To broaden and renovate it, broadening and renovating our conscience and existence. In regards to the deteriorating conditions of our people’s lives, the air, water and forests and the downfall of everyone’s hopes, we encourage a poetry of existence, the wide river of a new conscience that becomes spiritual mobilization, the deep resistance from the heart of words, imperative song that unites in a sense of future even in this hard, torturing time.” Meer inligting kan hier op hul hoofblad gelees word.

Indien jy ook hierdie petisie wil onderteken, kan jy gewoon ‘n e-pos stuur aan die organiseerder by poetryfestivalmedellin@yahoo.es met die versoek dat jou naam op die lys geplaas word. Inligting wat benodig word is jou naam, land van herkoms en professie.

So, mense, raak betrokke – stuur jou naam, want die poësie weier immers om te gaan lê in die graf wat daarvoor voorberei is. Of, soos Dylan Thomas dit in sy onvergeetlike reëls gestel het: “Do not go gentle into that good night. / Rage, rage against the dying of the light.” Sela. Ons het immers in 2005 twee delenemers aan dié fees gehad, by name Antjie Krog en Breyten Breytenbach …

Mag die naweek vir jou oproerig, dog sinvol wees, met as toegif, die slotparagraaf uit die reeds genoemde verklaring: “We call you to join in a patient and persistent poetic revolution, to freely and fearlessly express everyday your constructive thoughts, to lift your loving vision of a new life, to grow your dream of a sibling country and to share its belief of peace. Peace with social justice, peace with truth, peace with liberating energy, peace without armed figures, peace with full political agreement; unconditional peace, without ambiguities.”

Mooi bly.

LE

Peter Holvoet-Hanssen en die Medellin-poësiefees

Monday, July 6th, 2009
Peter Holvoet-Hanssen

Peter Holvoet-Hanssen

Die grootste poësiefees ter wêreld, naamlik die Medellinse fees in Colombia, het dié naweek begin en sal tot 11 Julie duur. Die fees, wat jaarliks deur bykans 35,000 mense bygewoon word, betrek vanjaar meer as 50 digters vanoor die hele wêreld; waaronder Peter Holvoet-Hanssen wat vanjaar die Vlaamse digkuns met ‘n borgskap deur die Vlaams Fonds voor de Letteren sal verteenwoordig. Holvoet-Hanssen, wat in 2007 die Vlaamse Kultuurprys verower het, se mees onlangse bundel is Navagio wat in 2008 verskyn het. Die VFL borg elke jaar een van hul digters om aan hierdie ongelooflike geleentheid deel te kan neem. Vorige geborgde deelnemers aan dié fees was onder andere: Luuk Gruwez, Stefan Hertmans, Erik Spinoy en Miriam Van hee. Hierdie is reeds die 19de fees wat in Medellin aangebied word.

Gaan lees gerus weer die Nuuswekker van 6 Mei wat oor Holvoet-Hanssen gehandel het, of besoek sy webblad by www.kapersnest.be

Dan het ons webmeester gedurende die naweek sommer heelwat nuwe leesstof op die webblad geplaas; snuffel rond en geniet! Ook is ons besonder opgewonde om Ronel Nel, die laaste van die twee nuwe bloggers, met haar eerste blog-inskrywing te verwelkom. Vanweë haar agtergrond as joernalis en haar betrokkenheid by verskeie innoverende poësie-projekte, is haar inskrywings beslis iets om na uit te sien … 

Mag hierdie week ‘n veugdevolle een wees.

Mooi bly.

LE  

  •