Posts Tagged ‘Melanie Grobler gedig’

Melanie Grobler. lamentasie by die verlies van

Monday, May 3rd, 2021

 

Lamentasie by die verlies van

 

Ek dra my swart rok/ rou oor die dood

van die groot Binne Biblioteek wat deel was van die Groot Berg/ bind

lang swart linte

 

om my verwilderde hare

in toom the hou

 

ondraaglik die stem van as

paragrawe van as

alles verpas

soos ’n auschwitz van gas

 

die duinende lamentasie

van die denne, roet en as

 

wat troos soek in eindelose

holtes van die vlamme

 

die Kaapse storm en die aan

houdende geween van gedagtes

wat so lank in stil sale

gerus

het/ ek het my swart linte verloor

 

ek huil/ ek hoor die fladdering van papier

of apokriewe geskrifte van ene Bleek

 

wat lank en rustig hier vertoef het/ ons het almal die asem van woorde verloor.

 

Rus sag of leun of vlug want alles is daarmee heen.

 

 

(Met verwysing na die Jagger biblioteek by die Universiteit van Kaapstad.)

 

© Melanie Grobler, 2021

Melanie Grobler. In Varanesi die stad van Shiva

Tuesday, December 29th, 2020

 

In Varanesi, die stad van Shiva, jaag rietskraal

as besmeerde ou Saddu’s met spierwit baarde

 

en oë donker van inkyk, op wilde perde

tussen die vlammende brandstapels

langs die logge lyf van die groot rivier

 

hier bevind my man homself, oorblyfsels en klein voëltjies

rumoer in sy mond, soos ’n patrysie krap hy in die grond

 

hy het sy vingerafdrukke verloor, nou eet hy

die vingers van melankolie, die hartstog van sy hande

en die bitter blare van nostalgie

 

oplaas trek hy trek sy sterfjas uit sodat die voëls

van begeerte vry oor die heilige Ganges kan sweef.

 

© Melanie Grobler, 2020