Posts Tagged ‘Oekariëne en Rusland’

Joan Hambidge. Vuurslag

Saturday, March 5th, 2022

 

Vuurslag

 

Water op die maan blyk

urine uit Apollo-14 te wees

 

‘n verlore beursie met ID

en kaarte gesteel teruggevind

 

‘n oorlog se impak op Kerkplein

met Kruger wat noord kyk nie oos

 

Alle eer aan God en nie aan mense

uit Psalm 105 was sy versoek

 

nooit op die bronsvoetstuk gebeitel

met die vier boerekrygers wat waghou

 

water op die maan blyk

urine uit Apollo-14 te wees

 

‘n verlore beursie met ID

en kaarte gesteel teruggevind

 

‘n kruis uitgekap in gevriesde water

waar die Russies-Ortodokse Poetin

 

hom doop gesondheid ter wille

gedenk die weg van Christus

 

vooraf geheilig deur ‘n priester

so die kryg en godsdiens versoen

 

oorlog en vrede woed steeds voort

in ‘n nuwe verskroeide aarde

 

water op die maan blyk

urine uit Apollo-14 te wees

 

‘n verlore beursie met ID

en kaarte teruggevind

 

Kitchener se oorlogbuit

soos boere sonder graan

 

in die Ukraïne einde van ABO

na slag van Majuba die beeld

 

van brons nie marmer

om die winters te trotseer

 

gewapende burgers op Kerkplein

deur Van Wouw in vier windrigtings

 

sittend waaksaam gespanne

met Oom Paul gemanel en kuil

 

water op die maan blyk

urine uit Apollo-14 te wees

 

‘n verlore beursie met ID

en kaarte teruggevind

 

Kitchener verbied monumente

Poetin wys ‘n ikoon af

 

beeld verskans agter ‘n heining

gevandaliseer gepetrolbom

 

1883 ZAR president ingesweer

groenspaan  vinger op sneller

 

water op die maan blyk

urine uit Apollo-14 te wees

 

‘n verlore beursie met ID

en kaarte teruggevind

 

© Joan Hambidge, 2022