Donderdag, 11 Junie 2009
Thursday, June 11th, 2009
Strijdom van der Merwe
Dit wyl my voorkom asof ons Afrikaanse kunstenaars omtrent die aandag gaan trek in Nederland hierdie naweek. So sal ek in môre se Nuuswekker berig oor ’n besonderse geleentheid by Hengelo, maar vanoggend wil ek die kollig fokus op een van ons mees uitsonderlike kunstenaars: die landskapskilder Strijdom van der Merwe. Strijdom is naamlik deur die organiseerders van die Oerol Kunstefees genooi om ’n kunswerk te gaan opsit by Terseschellinge as deel van hul fees wat van môre tot 21 Junie duur. Ek het Strijdom gevra om ons lesers so ietsie meer van sy kunswerk te vertel en sommer een van die haiku’s wat hy by ’n vorige kunswerk gebruik het, daarby aan te haak. Hy het soos volg gereageer: “Die 625 meter lang ry rooi vlae wat ek op uitnodiging van die fees-direkteur, Joop Mulder, by die Oerol Kunstefees in Terschellinge gaan opsit, is ‘n visueele uitbeelding van die verbintenis tussen die drie belangrikste elemente wat die vorming van die eiland betref: die see, strand en duinegebied. Getrou aan die tradisie van landkuns gebruik ek die rooi lyn om die feesgangers, asook inwoners, weereens te herinner aan die sensitiewe ekologiese balans tussen die natuur en die mens. Hierdie werk van wapperende rooi vlae herinner my aan een van die haiku’s wat Leandré Hanekom vir my Kunswerk by 2008 KKNK gekryf het –
Mag jou wit doek waai
oor vriesgebrande koue
warm, ryke seën bring
Voorspoed, Strijdom! Mag hierdie geleentheid vir jou alles wees wat jy hoop …
En laat wapper die vlae waar jy jou ook al mag bevind vandag!
Mooi bly.
LE
